Konferencë kushtuar “Caritas in Veritate”. Goti Tedeski: etikë e thjeshtësi, për të
dalë nga kriza!
U mbajt në Romë konferenca “Ekonomia botërore para e pas Enciklikës “Caritas in Veritate”,
perspektivat e ardhmërisë”. Enciklika, e vlerësuar si i pari dokument i madh papnor
kushtuar globalizimit, tërhoqi vëmendjen e njeriut mbi rreziqet që burojnë prej një
ekonomie të shkëputur nga etika e nga e vërteta e krishterë. Por cilat janë vlerat,
që kujton Benedikti XVI në Enciklikë e ç’ndihmesë mund të japin për ta kapërcyer
krizën e thellë ekonomike, që ka pushtuar – e tronditur - gjithë botën? Përgjigjet,
në mikrofonin tonë, drejtori i Institutit për Veprat e Religjonit (IOR), profesor
Ettore Gotti Tedeschi:
Përgjigje: - Njeriu duhet të rifitojë
vetëdijen e përgjegjësisë personale e t’i përdorë mjetet si mjete. Ky është një nga
mësimet e shumta të kësaj Enciklike të madhe, të jashtëzakonshme. Ajo, që ka humbur
gjatë gjithë këtij pështjellimi nihilist të kohëve të fundit, është fakti se mjetet
kanë fituar pavarësinë morale e janë kthyer në qëllime. Prandaj njeriu nuk di më si
t’i përdorë. I mungon ajo vetëdije, ajo pjekuri, që duhet, për të përdorur me sukses
mjete kaq të përparuara, siç janë të sotmet. E kjo nuk ndodh vetëm në atë, që njihet
me emrin “financë”, por pothuajse në të gjitha disiplinat shkencore.
Pyetje:
- Në analizën tuaj, ju shprehni mendimin se zanafilla e krizës duhet kërkuar në
plakjen e popullsisë së botës perëndimore. Kjo situatë çon në rritjen e konsumit,
me pasojë rritjen e kostos e të taksave, gjë që s’mund të ketë përfundim tjetër, veç
atij të mbytjes në borxhe. Me sa duket, pra, kriza ka edhe një zanafillë tjetër, atë
morale....
Përgjigje: - Pa kurrfarë dyshimi. Papa e kuptoi
menjëherë se zanafilla e kësaj krize duhej kërkuar tek njeriu, tek humbja e vetisë
së tij themelore: dinjitetit. Nihilizmi, i cili e çon njeriun deri në atë pikë, sa
ta quajë veten kafshë që mendon e që, prej këndej, duhet të plotësojë vetëm nevojat
materiale, s’mund të jetë tjetër, veçse shlyerje e vetë dinjitetit! Kjo e shtyu njeriun,
për 20 a 30 vjet, në një garë të shfrenuar konsumistike, e nxiti të rendë drejt një
konsumizmi pa pikën e kuptimit, e bëri të mendojë se duhet të kënaqë vetëm nevojat
e trupit. Po njeriu nuk është vetëm trup: përbëhet nga trupi e nga shpirti. Nuk ka
nevojë vetëm për sende materiale, por edhe e sidomos, ka nevojë për ushqim shpirtëror,
mendor – mjafton të mendojmë për madhështinë e Mësimeve, që Kisha i jep njeriut -
e njeriu nuk do t’i dëgjojë....
Pyetje: - Por, këto vërejtje, pastaj,
a janë konkretizuar në veprimtaritë e bashkësisë ndërkombëtare? Kam parasysh sidomos
ndihmat për Greqinë e edhe përpjekjen për të shpëtuar bankat...
Përgjigje:
- Jo. Jo. Sepse kjo bashkësi nuk reflektoi thellë, siç duhej të bënte.
U mjaftua të thotë: “Etika duhet vënë në qendër të vëmendjes, në të gjitha veprimtaritë:
etika në veprimtaritë ekonomike, etika në politikë”. Pastaj në se ndokush pyet: “Po
a mund të na thoni, ç’është kjo etikë e si duhet vënë në themel të të gjitha veprimtarive?”,
nuk merr kurrfarë përgjigjeje. Pyetjeve të tilla i përgjigjet vetëm heshtja. Njeriu
‘modern’ nuk do as ta dëgjojë fjalën etikë, nuk do t’ia dijë se duhet të punojë duke
respektuar normat morale. E kjo sepse automatikisht njeriu relativist pyet: “për ç’moral
bëhet fjalë?”; “E kush e vendos ç’është morale e ç’është amorale?”; “Kush mund të
na bindë ç’është e mirë e ç’është e keqe?”. Për pasojë njeriu e ka shlyer atë proces
mendor, që e çon deri atje, sa të thotë: “Kjo është e mirë, e kjo, e keqe”. Bota moderne
i ngatërron tepër shpesh këto dy kategori themelore, të pangatërrueshme, sepse në
fund të shpirtit, edhe njeriu më relativist, në mos e kuptoftë, e ndjen në thellësitë
e ndërgjegjes ç’është e mirë e ç’është e keqe.
Pyetje: - Ju keni
pohuar se borxhet e shteteve mund të kapërcehen vetëm përmes zhvillimit ekonomik e,
në rastin e Italisë, përmes investimeve masive në ndërmarrjet e vogla e të mesme.
Por, a ka edhe një rrugë a mënyrë të krishterë, për të dalë nga kriza?