Festivali i muzikës kishtare i kushtohet Shën Marisë Virgjër. E pranishme, “Wiener
Philharmoniker”
Festivali i muzikës dhe i artit kishtar, takim tradicional e prestigjioz i vjeshtës
romake, mbush 10 vjet dhe i feston me një program, kushtuar shën Marisë Virgjër, i
pasur me të ftuar ndërkombëtarë e me çaste të rralla. Nga 26 tetori deri më 6 nëntor,
në bazilikat patriarkale romake dhe në kishën e Shën Injacit në qendër të Romës, do
t’i zënë vendin njëri-tjetrit katër kore, po aq orkestra, shtatë dirigjentë dhe 20
solistë, që do të interpretojnë faqe të mrekullueshme të muzikës kishtare. Të ftuar,
orkestra e famshme “Wiener Philarmoniker” e Filarmonia e Montekarlos. Qëllimi i festivalit
është ta çojë muzikën kishtare aty ku e ka zanafillën, në vendet e kultit, pikërisht
për t’i mbrojtur këto të fundit. Vërtet, me ndihmën e Fondacionit që organizon festivalin,
janë restauruar 13 vepra të çmuara arti. I fundit është Mauzoleu, i ashtuquajtur “i
Marçëve”, i cili daton në shekullin II-III pas Krishtit e ndodhet në Nekropolin e
Bazilikës së Shën Pjetrit. Të dëgjojmë presidentin e Fondacionit, Hans Albert Kurtial: “Lidhja
ndërmjet muzikës dhe artit kishtar është arsyeja për të cilën kur njerëzit, brenda
Bazilikës, dëgjojnë muzikën e shohin bukurinë e artit, ndjejnë se zemrat e ndjenjat
e tyre priren kah Zoti”. Jetojmë në një epokë, ku dëgjojmë e shohim shumë
shëmti, nënvizon kryeprifti i Bazilikës Vatikanase, kardinal Angjelo Komastri. Festivali
është një oazë bukurie muzikore dhe artistike, që i bëhet njerëzimit: “Ky festival
i kushtohet Zojës. Kanë kaluar 1580 vjet nga Koncili i Efesit, një Koncil, ku u afirmua
doktrina katolike, që i njeh shën Marisë një rol të jashtëzakonshëm në historinë e
shëlbimit. E është diçka shumë e bukur të nënvizohet se Zoti lëviz në botë, duke trokitur
në portën e lirisë njerëzore. Porta e Marisë është e hapur dykanatësh, por sa porta,
ku troket Zoti, mbeten të mbyllura? Ja përse bota është kaq e ndërlikuar, kaq e ndrydhur...” Programi
i festivalit është shumë tërheqës për dashuruesit e artit. Gjashtë koncerte në kornizën
e dy Meshëve në Bazilikën e Shën Pjetrit, atë të fillimit, të “Kurorëzimit” kompozuar
nga Moxart dhe atë të fundit, “Missa Tira Corda” e Oracio Benevolit, për 16 zëra.
Diçka e rrallë kjo, nga Baroku, që parashikon praninë e katër koreve e të katër organove.
Ndër ta, zërat e bardha të jashtëzakonshme të korit “Tëlzer Knabenkor”, të pranishëm
edhe të nesërmen, më 6 nëntor, në kishën e Shën Injacit të Lojolës, me një program
nga kompozitori Sebastian Bah. Orkestra “Wiener Philharmoniker” do të jetë e pranishme
në Bazilikën e Shën Palit jashtë Mureve, më 27 tetor, ndërsa Orkestra filarmonike
e Montekarlos, për herë të parë në Romë, do të sjellë në Qytetin e Amshuar, violinisten
e talentuar Julia Fisher.