Papa priti në audiencë Presidentin e Hondurasit: solidariteti, paqja dhe e mira e përbashkët në qendër të bisedimeve

Sot paradite në Vatikan, Ati i Shenjtë Benedikti XVI priti në Audiencë Presidentin e Republikës së Hondurasit, SK. T. zotin Porfirio Lobo Sosa, i cili më pas është takuar me Sekretarin e Shtetit të Vatikanit, hirësinë e tij kardinalin Tarçizio Bertone, shoqëruar nga Sekretari i Selisë së Shenjtë për Marrëdhëniet me Shtetet, shkëlqesia e tij imzot Dominique Mamberti.
Në qendër të bisedimeve solidariteti, paqja dhe e mira e përbashkët. Kështu, gjatë bisedimeve të përzemërta është vlerësuar kontributi i madh që Kisha katolike ofron për zhvillimin e Vendit, posaçërisht në fushën edukative e atë shëndetësore dhe është nënvizuar rëndësia e vazhdimit të punës për të favorizuar në Vend pajtimin dhe mirëkuptimin e anasjelltë, solidaritetin e paqen, në kërkimin e qëndrueshëm të së mirës së përbashkët.
Në vijim të bashkëbisedimeve është trajtuar edhe fakti i kthjellimit dhe i qetësimit të marrëdhënieve ndërkombëtare të Hondurasit pas puçit ushtarak në kryeqytetin Tegusigàlpë më 2009, si dhe janë trajtuar tema tjera lidhur me situatën botërore.