Me 12 tetor, pra dje, Brazili kremtoi festën e pajtores së tij, Zojës së Aparesidës.
Dhjetëra mijëra shtegtarë u mblodhën në Shenjtëroren mariane për këtë festë, që brazilianët
e kremtojnë gjithnjë me gëzim e përshpirtëri të madhe. Për këtë flet, në mikrofonin
tonë, kardinali Raymundo Damasceno Assis, kryeipeshkëv i Aparesidës dhe kryetar
i Konferencës ipeshkvnore braziliane:
Kjo është një nga festat më të rëndësishme,
sepse festohet pajtorja qiellore e Brazilit, Nossa Senhiora Aparecida, shtatorja e
vogël e së cilës u duk në lumin Paraiba, në vitin 1771. Është një nga shtatoret e
Zojës së Papërlyer, të cilën peshkatarët e gjetën dhe e çuan në shtëpinë e tyre.
E kështu nisi devocioni për Zojën. Pak më vonë brazilianët e quajtën “e Aparecidës”
, që do të thotë “Ajo, që u duk në lumin Paraiba”. Me këtë titull i drejtohen në lutje
besimtarët e Brazilit, që e zgjodhën si pajtoren e tyre qiellore. Është devocion shumë
i thellë, prandaj për këtë festë në qytetin e Aparesidës, dje u mblodhën më se 200
mijë shtegtarë. Aparesida, qytet krejt i vogël, pret çdo javë, gjatë gjithë vitit,
me mijëra shtegtarë. Sivjet numri i shtegtarëve që vizituan Shenjtëroren e Pajtores
së Brazilit, e kaloi shifrën 11 milionë.
Diçka për devocionin e brazilianëve
ndaj Zojës?
Është tepër i fortë. E them gjithnjë se katolicizmi në Brazil
ka tri shtylla themelore: devocionin për Eukaristinë, devocionin për Zojën e devocionin
dhe dashurinë për Atin e Shenjtë, Pasardhësin e Pjetrit. Janë tri shtyllat mbajtëse
të krishterimit në Brazil.