Rusi: paraqitet, në Moskë, Katekizmi i Kishës greko-katolike të Ukrainës.
Katekizmi i Kishës greko-katolike të Ukrainës (Ugcc) titulluar “Krishti është Pashka
jonë”, u paraqit zyrtarisht në Moskë nga admnistratori i famullisë së Shën Injacit
të Antiokisë, atë Sergei Nikolenko dhe nga drejtuesi i kanalit zyrtar të selisë për
katolikët e ritit bizantin në Rusi , Oleksandr Shvedov. Sipas Shvedovit, që paraqiti
strukturën e përgjithshme të librit, katekizmi u realizua mbi bazën e parimit “normat
e lutjes - normat e fesë”. Dy bazat kryesore të tekstit janë ‘Besojma’ dhe ‘Liturgjia
e Bazilit të Madh’. Atë Nikolenko, duke kujtuar katolikët e Rusisë, për të cilët
u përgatit Katekizmi i Kishës greko-katolike të Ukrainës, i pëshkruan si njerëz të
ndikuar fuqimisht nga kultura e fshatit, ku traditat fetare e njerëzore të familjes
patriarkale nuk janë zhdukur ende. Do të ishte pozitive ripërtëritja dhe rrënjosja
e tyre në shpirtin e besimtarëve. Sipas disa statistikave, 5,5 milionë vetë pohojnë
se janë anëtarë të Kishës greko- katolike të Ukrainës, gjë që e bën këtë Kishë katolike
të ritit lindor, më të madhen në botë. Kjo bashkësi shquhet për ruajtjen e traditave
fetare-kombëtare, që praktikohen besnikërisht sidomos në pjesën lindore të vendit.
Duhet kujtuar se Kisha katolike e ritit lindor vijon të përhapet me shpejtësi edhe
në Veri e në Jug të Amerikës, në Australi e në vende të ndryshme evropiane. Në zonën
evropiane të Rusisë, anëtarët e Kishës greko-katolike të Ukrainës jetojnë kryesisht
në Moskë, në Shën Petersburg, në Obninsk e në Kaliningrad.