Kosovë: Oda e Avokatëve dënon sulmin ndaj avokatit Anton Nokaj
Oda e Avokatëve të Kosovës (OAK), reagon ndaj sulmit vandal kundër anëtarit të saj
avokatit, Anton Nokaj, të enjten e kaluar në Prishtinë. OAK me këtë rast kërkon nga
organet e rendit, që sa më parë ta zbardhin rastin dhe aktorët e këtij akti të shëmtuar
të dalin para drejtësisë. OAK rikujton detyrimet e qeverisë dhe organeve përkatëse
të saj për të garantuar pavarësinë dhe lirinë e ushtrimit të profesionit të avokatit
në tërë territorin e Republikës së Kosovës, duke evituar çdo pengesë apo kërcenim
që del në këtë rast. "Konsiderojmë se çdo akt i drejtuar kundër avokatit derisa
ai e ushtron profesionin e vet, është njëkohësisht edhe kundër avokatisë dhe sistemit
të drejtësisë në Kosovë, e cila po bën përpjekje të vazhdueshme për krijimin e rendit
dhe vënien e sundimit të ligjit", theksohet në komunikatën e OAK, duke i konsideruar
"synime të përhershme angazhimet për ruajtjen e pavarësisë së profesionit të avokatit
dhe pushtetit gjyqësor si themele të shoqërisë së lirë e demokratike".