E Briri i Afrikës është protagonisti edhe i editorialit të sotëm të zëdhënësit të
Selisë së Shenjtë, atë Federiko Lombardi, drejtor i përgjithshëm i Radio Vatikanit.
Ai përqendrohet në impenjimin e Vatikanit në OKB, duke shpjeguar se arsyeja e ngjitjes
së përfaqësuesit të Papës në tribunën e kombeve bëhet për t’u kujtuar atyre vlerat
njerëzore e përgjegjësinë e përbashkët për krejt njerëzimin, për t’u thënë se asnjë
vend nuk mund të jetojë në paqe e në begati, nëse këto të dyja nuk mbretërojnë edhe
në shtetet e tjera:
“Nganjëherë na pyesin pse një autoritet fetar si Selia
e Shenjtë merr pjesë në mbledhje botërore si Asambleja e Kombeve të Bashkuara, shpesh,
teatër ndeshjesh të ashpra politike. Statusi i Selisë së Shenjtë është ai i vëzhguesit,
prandaj nuk merr pjesë në votime, por për ta kuptuar “pse”-në, mjafton të lexojmë
fjalimin e Shkëlqesisë së Tij, imzot Mambertì, Sekretar për Marrëdhëniet me Shtetet,
në sesionin aktual. Është e lehtë të dallohet vazhdimësia me ndërhyrjet
e fundit të Papëve në Nju Jork. Gjon Pali II pati theksuar me forcë se Kombet e Bashkuara
duhet të jenë vendi ku kombet e shohin veten si anëtarë të një “familjeje”, e cila
jeton me solidaritet të ndërsjelltë dhe me shqetësim për të mirën e përbashkët të
krejt njerëzimit. Në dritën e këtij këndvështrimi, Benedikti XVI pati zhvilluar konceptin
e “përgjegjësisë së mbrojtjes”, si shprehje konkrete e kujdesit për më të vobektit. Imzot
Mambertì niset që këndej, duke e kërkuar këtë përgjegjësi për krizat humanitare të
sotme – si ajo e Bririt të Afrikës – e për mbrojtjen e paqes, të sigurisë e të të
drejtave të njeriut. Ngul këmbë pastaj për lirinë fetare, sot, tepër shpesh e dhunuar
haptas, ose e kufizuar me metoda të holla, duke e mënjanuar fenë nga jeta e shoqërisë.
I kthehet pastaj sërish marrëdhënieve ndërmjet etikës dhe ekonomisë, në bazë të krizës
globale aktuale. Flet për zhvillimin e qëndrueshëm, të cilit OKB-ja do t’i kushtojë
së shpejti një konferencë ndërkombëtare, duke kujtuar pikërisht që vetëdija se jemi
“familje kombesh” udhëheq e mbështet përgjegjësinë për mbrotjen e ambientit, apo luftën
kundër tregtisë së armëve. “Familja është një bashkësi e themeluar mbi
ndërvarjen, mbi besimin e ndërsjelltë, mbi ndihmën për njëri-tjetrin dhe mbi respektin
e sinqertë”, përfundon Mambertì. Ta kujtojë, në interesin e çdo njeriu, që të bëhet
realitet i gjallë në botë. Sidomos për këtë, Selia e Shenjtë është në Nju Jork”.