Papa të dielën do të vizitojë dioqezën italiane Lamezia Terme e Manastirin murgar
të Serra Shën Brunos në Kalabri.
Vlojnë përgatitjen e fundit në Lamezia Terma e në Çertozë (manastir) të Serra San
Bruno, në Kalabri, ku Papa do të shkojë për vizitë këtë të diele. Është fjala për
udhëtimin e 25-të baritor të Benedikti XVI në Itali. Pak ditë para arritjes së Atit
të Shenjtë Jozef Ratcinger, Çertoza apo Manastiri i Serra San Brunos feston sot themeluesin
e vet, shën Brunon murg, përkujtimin liturgjik të të cilit Kisha e shënon sot. Një
shenjt për të cilin Papa ka folur në raste të ndryshme. Pra, të dielën e ardhshme,
në ora 18.00 Benedikti XVI do të kryesojë lutjet e mbrëmësores në Manastirin e themeluar
nga Shën Bruno në shekullin XI. Shën Bruno është me prejardhje nga Këlni i Gjermanisë,
profesor i teologjisë e i filozofisë, të cilin Papa Urbani II e thirri si këshilltar
personal në Romë. Në periudhën e karakterizuar nga lufta për pushtet dhe ambiciet
e mëdha, edhe në fushën kishtare, ai refuzoi të bëhet ipeshkëv, hoqi dorë nga autoriteti
e pushteti kishtar. Themelon Çertozinët, Urdhrin e Murgjve. Preferon heshtjen dhe
kundrimin në mënyrë që intimiteti me Zotin ta shndërron jetën e tij: “Heshtja
dhe kundrimi – karakteristikë e shën Brunos – në shkapërderdhjet e çdo dite shërbejnë
për të gjetur thellësinë e vazhdueshme të bashkimit tonë me Zotin...në zhurmën e pafund
të fjalëve që karakterizon kohën tonë, e kohët tjera, në inflacionin e fjalëve, ai
kërkon të mishërohen fjalët thelbësore. Në fjalët e njerëzve të mishërohet Fjala,
Fjala që vjen nga Zoti, Fjala që është Hyj. (Homelia, 6 tetor 2006). Në heshtje
– pohon Papa – fjalët tona pastrohen, përtërihen, bëhen të vogla para madhështisë
së Zotit, që Fjala e tij të jetë e dëgjuar në botë: “E kështu, përsëri, jemi
të thirrur në këtë udhë të mohimit të fjalëve të tona; jemi të thirrur ti përmbahemi
kësaj udhe të spastrimit, e cila shërben që fjalët tona të jenë vetëm vegla përmes
të cilave Zoti mund të flasë”. (Homelia, 6 tetor 2006) Heshtja e shën Brunos
na udhëheq drejt një të foluri të “pastër”, pra që nuk është plot me vetveten, në
kërkim të shpërblimeve, por që përshkohet e mbushet me të vërtetën: “Me fjalë
tjera, të flasësh për të marrë duartrokitje, të flasësh duke u orientuar ndaj asaj
që njerëzit duan të dëgjojnë, të flasësh në dëgjesën e diktateve të opinioneve të
zakonshme të përbashkëta të kohës, konsiderohet si një lloj prostitucioni të fjalëve
e të shpirtit. ‘Pastërtia’ nuk është nënshtrim ndaj standardeve, nuk është kërkim
i duartrokitjeve, por do të thotë të kërkosh t’i bindesh së vërtetës”. (Honmelia,
6 tetor 2006). Shën Bruno, së fundi, nuk bënë gjë tjetër përveç se na tregon udhën
e Jezusit, fjalët e të cilin kanë lindur në heshtje të lutjes, mbi Mal, në të qenurit
të tij me Atin: “Nga kjo heshtje e bashkimit me Atin, nga të qenurit të zhytur
në Atin, lindin fjalët....Zoti na fton...të ngjitemi me Të mbi Mal, e në heshtje,
të zbulojmë dhe të mësojmë kështu, përsëri, kuptimin e vërtetë të fjalëve”. (Homelia,
6 tetor 2006).