Беларусь: рэлігійныя арганізацыі і ўлады сумесна супраць абортаў
У Беларусі на фінальную
прамую выйшаў пілотны праект па прафілактыцы абортаў – гэта сумесная праца рэлігійных
арганізацый і Міністэрства аховы здароўя. Пачаўся ён у маі гэтага года, а завяршыцца
павінен у лістападзе. Увесь гэты час у 6 жаночых кансультацыях Мінска працуюць валанцёры:
католікі і праваслаўныя. Яны размаўляюць з жанчынамі, якія прыйшлі, каб здзейсніць
аборт. Інфармацыйныя буклеты, спакойная размова, дэманстрацыя муляжоў эмбрыёнаў у
натуральную велічыню – кіраўнік цэнтра “Матуля” Вераніка Сярдзюк кажа – у ход ідуць
любыя метады, каб захаваць жыццё. Але гэта, на жаль, атрымоўваецца не заўсёды.
Па
статыстыцы, сёння ў Беларусі на 100 народжаных дзяцей – 38 абортаў, за апошнія гады
іх колькасць знізілася, але да гэтага часу застаецца адной з самых высокіх у краінах
СНД. Кожны шосты аборт – гэта перапыненне першай цяжарнасці ва ўзросце ад 20 да 26
гадоў. Прычым, у 70% выпадкаў аборт прыводзіць да цяжкіх наступстваў, у тым ліку бясплоддзя.
Таму, як адзначыў галоўны акушэр-гінеколаг аддзела дапамогі маці і дзіцяці Мінаховы
здароўя Беларусі Аляксандр Барсукоў, вырашана было змагацца з праблемай, як кажуць,
усім светам.
Вынікі пілотнага праекта падвядуць у лістападзе. Калі яго прызнаюць
станоўчым, праект, магчыма, распаўсюдзяць на ўсю краіну. Напрыклад, за 2 апошнія месяцы
толькі ў адной кансультацыі пасля размовы з валанцёрамі 3 жанчыны не зрабілі аборт
і сталі на ўлік па цяжарнасці. Але не колькасць тут вырашальная, нават адно новае
жыццё – ужо перамога для ўсіх.