Shqipëri: procesi i regjistrimit ecën sipas parashikimeve.
Në Shqipëri regjistrimi i Popullsisë dhe i Banesave që ka nisur në datë 1 tetor në
terren, ku 12 mijë anketues po trokasin derë më derë për të mbledhur të dhënat e Censusit,
vazhdon të ecën mirë. Instituti i Statistikave njoftoi sot se procesi i censusit në
të gjithë vendin po ecën sipas dinamikës së parashikuar. Përmes një komunikimi me
mediat, INSTAT bëri të ditur se deri tani janë kryer anketime në 21 % të banesave
në të gjithë vendin. "Ritmi i deritanishëm tregon që procesi po ecën mirë dhe kemi
arsye të jemi optimistë që ky proces do të përfundojë me sukses", u shpreh zëdhënësja
e INSTAT-it, Vjollca Simoni. Sipas INSTAT-it në 5 ditët e para të daljes së anketuesve
në terren problemet që janë hasur kanë qenë raste të izoluara dhe për zgjidhjen e
tyre janë marrë masat e nevojshme. INSTAT ftoi të gjithë qytetarët që të mirëpresin
anketuesit, ndërsa theksoi se procesi do t'i shërbejë ndërmarrjes së politikave më
të mira sociale e ekonomike të vendit. Ky proces, theksoi Simoni, po ecën mirë dhe
jemi optimistë. Gjatë procesit mund të dalin edhe probleme por ato kanë qenë raste
të izoluara dhe kemi marrë masat për një proces të drejtë. "Dëshirojmë të adresojmë
edhe disa shqetësime të qytetarëve lidhur me pasojat juridike të Censusit për çështje
që lidhen me taksat apo kombësinë. Censusi është një matje statistikore që nuk ka
të bëjë me regjistrin civil, taksat, pronat, pensionet apo kombësinë. Censusi i popullsisë
dhe banesave numëron individët, banesat, njësitë ekonomike familjare në të gjithë
territorin e Shqipërisë, të cilat do të publikohen në formë të agreguar dhe vetëm
për qëllime statistikore. Vetëm të dhënat e sakta që sigurohen nga censusi mund
të shërbejnë si bazë për të planifikuar politika sociale dhe ekonomike", tha më tej
Simoni. Censusi i Popullsisë dhe Banesave ka nisur në datë 1 tetor në terren, ku
12 mijë anketues po trokasin derë më derë për të mbledhur të dhënat e Censusit. Për
këtë proces masiv në terren janë printuar 40 milion faqe materiale censusi dhe po
punojnë 12 mijë anketues, 2 330 kontrollorë, 128 mbikëqyrës 36 koordinatorë lokalë.
Aktualisht në të gjithë Shqipërinë janë 374 zyra censusi dhe 11 në Tiranë që punojnë
çdo ditë pa ndërprerje të aftë për të zgjidhur çdo situatë në terren. Me anë të
Censusit do të merren informacion mbi popullsinë e Shqipërisë, se sa njerëz jetojnë
në këtë vend, si jetojnë ata, çfarë pune bëjnë etj. Pra të dhënat e censusit i shërbejnë
vetë qytetarëve të këtij vendi që është Shqipëria.