Papa në audiencën e përgjithshme: në shkretëtirën e racionalizmit, Zoti është Bariu
i Mirë, që e ruan Kishën e vet
E të kthehemi tani tek audienca e sotme e përgjithshme e Papës. “Kur Zoti e hap tendën
e vet për të na strehuar në të, asgjë s’mund të na bëjë keq”: ky qe mesazhi i besimit
të plotë në Hyjin, që Benedikti XVI e vuri në dukje gjatë meditimit për Psalmin e
njohur 23, atë të “Bariut të Mirë”. “Nuk më mungon asgjë”:
ky varg i Psalmit, të cilin Kisha e përsërit që prej 2000 vjetësh, marrë nga një lutje
edhe më e lashtë, shpreh mirëdashjen pa kufi të Zotit për krijesën e vet. Ai është
Bariu i Mirë, që e çon grigjën e vet në kullota plot gjelbërim dhe kujdeset për të,
i do të mirën: “Të dashur vëllezër e motra, edhe ne, si psalmisti, nëse ecim
pas ‘Bariut të Mirë’, sado të vështira, dredharake e të gjata mund të duken shtigjet
e jetës, shpesh edhe në zona të shkreta shpirtërisht, pa ujë e nën diellin përvëlues
të racionalizmit, nën udhëheqjen e bariut të mirë, Krishtit, jemi të sigurtë se shkojmë
në rrugë ‘të drejtë’ e se Zoti na drejton, na qëndron gjithnjë afër e asgjë nuk do
të na mungojë”. Në një çast të caktuar, mbi grigjën bie errësira e natës. Siç
tha Papa, ajo rrezikon të pengohet diku, ose të shpërndahet e të humbasë. Por psalmisti
nuk ka frikë, është i qetë dhe i sigurtë, siç duhet të ndjehen edhe besimtarët e Kisha: “Fraza
‘ti je me mua’ është shpallja e besimit të patundur e sintetizon përvojën e fesë së
rrënjosur; afërsia e Zotit e shndërron realitetin, lugina e errët nuk është më e rrezikshme,
zbrazet nga çdo kërcënim. Grigja mund të ecë tani e qetë, e shoqëruar nga zhurma familjare
e shkopit, që troket në tokë e sinjalizon praninë mbrojtëse të bariut”. Pas
barit e ujit, skena e Psalmit zhvendoset brenda një tende, ku bariu jeton me grigjën
e vet e ku psalmisti – nënvizoi Papa – pritet me bujari. Edhe këtu, mbretëron qetësia: “Psalmisti
është në qendër të shumë përkujdesjeve, është një udhëtar, që gjen strehë në një tendë
mikpritëse, ndërsa armiqtë e tij duhet të ndalen e të shohin, pa mundur të ndërhyjnë,
sepse ai, që e konsideronin pre, është tani në besë, si mik i shenjtë, i paprekshëm.
Si psalmisti jemi edhe ne, nëse besojmë vërtet në bashkimin me Krishtin. Kur Zoti
e hap tendën e vet për të na strehuar, asgjë nuk mund të na bëjë keq”. Papa
e përfundoi katekizmin, duke kujtuar si figura e lashtë e Bariut të Mirë gjeti në
Jezu Krishtin, domethënien e saj të plotë: “Jezusi është ‘Bariu i Mirë’, që
shkon në kërkim të deles së humbur, që i njeh delet e veta dhe jep jetën për to. Ai
është udha, rruga e drejtë, që na sjell në jetë, drita, që ndriçon luginën e errët
dhe fiton mbi çdo frikë… Kush ecën me Zotin, edhe në luginën e errët të vuajtjes,
të pasigurisë e të të gjitha problemeve njerëzore, ndjehet i sigurtë. Ti je me mua:
kjo është siguria jonë, ajo që na mban”. Në fund të audiencës, Benedikti XVI
përshëndeti delegacionin e Fakultetit të Teologjisë së Universitetit grek të Selanikut,
që i dha Atit të Shenjtë medaljen e artë “Apostulli Jazon”. Papa u kujtoi të gjithëve
festën e Zojës Rruzare, që do të kremtohet të premten, duke i ftuar besimtarët të
rizbulojnë lutjen e Rruzares si rrugë për ta takuar personalisht Krishtin.