“Менавіта “дыялог
у любові” з’яўляецца рухавіком экуменічных адносін паміж католікамі і праваслаўнымі
ў Германіі”, - сказаў у інтэрв’ю “L’Osservatore Romano” кардынал Курт Кох, старшыня
Папскай рады спрыяння хрысціянскаму адзінству.
Каментуючы сустрэчу Святога
Айца з прадстаўнікамі Праваслаўных Цэркваў, якая адбылася падчас Апостальскага візіта
Пантыфіка ў Германію кардынал Кох расказаў, што нямецкія праваслаўныя, у сваёй большасці
з’яўляюцца эмігрантамі, першая хваля якіх прыбыла пасля рэвалюцыі 1917 г. у Расіі,
другая падчас эканамічнага бума 1970-х г. у асноўнай частцы з Грэцыі і Сербіі. “Трэцяя
хваля эмігрантаў праваслаўнага веравызнання прыбыла ў Германію, пасля распада камуністычнага
блока ва Усходняй Еўропе і вайны ў былой Югаславіі”, - расказаў іерарх.
Кардынал
Кох адзначыў, што дыялог любові, які існуе паміж католікамі і праваслаўнымі, вельмі
цэніцца абодвума бакамі. “Бэнэдыкт XVI вельмі спрыяе яму, і падчас сваёй прамовы ў
Фрайбургу ён падкрэсліў, што праваслаўныя з’яўляюцца самымі блізкімі нам сярод хрысціян.
Мы маем адну веру і падобную эклезіяльную структуру”, - адзначыў іерарх.
Сярод
перашкодаў на шляху да адзінства, кардынал назваў прымат св. Пятра, які з’ўяляецца
найбольш важным пытаннем у дыялогу з Праваслаўнымі Цэрквамі. “Але Бэнэдыкт XVI патлумачыў,
грунтуючыся на энцыкліцы Яна Паўла ІІ “Ut unum sint”, у чым заключаецца розніца паміж
існаваннем гэтага прымата і формай яго ажыцяўлення. Гэта розніца можа адкрыць многія
шляхі для больш грунтоўнай дыскусіі ў будучыні”, - сказаў кардынал Кох.