Kardinali Bertone Radio Vatikanit: kudo e me kompetencën më të madhe, të jeni “zëri”
i Papës dhe i Kishës në botë
Në 80-vjetorin e themelimit, në ditën kur liturgjia kujton Pajtorin e saj, Kryeengjëllin
Gabriel, Radio Vatikani përjetoi sot paradite një çast intensiv feste. Sekretari i
Shtetit të Vatikanit, kardinali Tarçizio Bertone kryesoi një Meshë solemne në Kopshtet
e Vatikanit, pikërisht në sheshin para Shpellës së Zojës së Lurdës, ku mori pjesë
e gjithë bashkësia e punonjësve të Radios së Papës e natyrisht, edhe ne të programit
shqip.
Gjatë homelisë,
duke përshëndetur princeshën Elektra Markoni, kardinal Bertone kujtoi takimin ndërmjet
Papës Piu XI dhe Guljelmo Markonit, nga i cili, më 12 shkurt 1931, mori jetë antena
dhe trasmetuesi i parë i Radio Vatikanit. Që atëherë, radioja vazhdon punën e saj
për përhapjen e Fjalës së Krishtit, të aktivitetit të Papës e të Kishës Katolike në
botë, thelb, që nuk ka ndryshuar as sot, siç theksoi Sekretari i Shtetit: “Duhet
që Radio Vatikani të vazhdojë të jetë një mjet komunikimi tipik kishtar, pra, i lidhur
në mënyrë jetësore me Kishën, njësoj si dega me hardhinë që e ushqen… Duke u dhënë
të gjithëve informacion mbi realitetin e Kishës e për praninë e Zotit të Ringjallur
në të, ju përgatisni kushtet e favorshme, që njeriu i sotëm t’ia hapë zemrën pranisë
shëlbimprurëse të Hyjit e ta kuptojë meditimin e Kishës, dashur nga Zoti si mjet i
frytshëm për shëlbim”. Ndër detyrat themelore, të njohura universalisht, Radio
Vatikani ka atë të përhapjes së mësimeve të Papës. Megjithatë, nënvizoi kardinali
Bertone: “Nuk është puna të shërbejmë vetëm si rezonancë për ç’bën e ç’thotë
Papa, por duhet të referojmë besnikërisht të vërtetat, që na mëson Kisha, sidomos
përsa i përket fesë e moralit, ashtu siç interpretohen e mësohen nga Magjisteri… Vërtet,
e dimë se opinioni publik e sheh Emitenten tonë si “Radioja e Papës” dhe e konsideron
çdo gjë që ajo transmeton si “informacion më se me autoritet””. Detyrë tjetër
e Radio Vatikanit është shpallja e Ungjillit në shumë gjuhë e për shumë kultura, duke
qenë vazhdimisht në dialog me botën, në mënyrë të tillë që të mos e ulë nivelin e
mesazhit e të vërtetën që sjell ai: “Duhen paraqitur arsyet e fesë, që, si të
tilla, shkojnë përtej çdo këndvështrimi ideologjik e duhet të kenë të drejtë të plotë
qytetarie në debatin publik. Nga kjo kërkesë, lind impenjimi juaj i vazhdueshëm për
t’u dhënë zë atyre pikëpamjeve, që pasqyrojnë mendimin katolik për çështjet, sidomos
për ato etike e shoqërore”. Në fund, prelati vuri në dukje zgjerimin e Radio
Vatikanit gjatë 80 vjetëve. Sot, ajo është e zhytur në udhëkryqin, ku takohen të gjitha
mediat, nga komunikimi digjital, tek interneti e tek celularët e brezit më të ri tekonologjik: “Sfida
të tilla duket se na kërkojnë të hyjmë me vendosmëri e me guxim në botën e multimedialitetit
e, të zhvillojmë sinergji të reja, sidomos me institucionet e tjera të komunikimit
në Selinë Apostolike, me logjikën e bashkëndarjes së përmbajtjes”. Pas Meshës,
drejtori i përgjithshëm i Radio Vatikanit, atë Federiko Lombardi, njëkohësisht zëdhënës
i Selisë së Shenjtë, u dha gjashtë punonjësve të Radios një shenjë nderimi për punën
e bërë. Po përmendim këtu, nderimin që iu bë, për herë të parë një pensionisteje,
anëtare e redaksisë bullgare, Maria Tonçeva. Ja fjalët emblematike, që i drejtoi asaj
atë Lombardi: “Shembull i jetës së krishterë, i optimizmit dhe i qetësisë shpirtërore.
Grua, nënë, gjyshe, e urtë dhe e dashur. Fryma e saj gjithnjë rinore na kujton se
edhe pas moshës 80 vjeçare, mund të shpallësh gëzimin e shpresën, ashtu si duhet të
bëjë Radio Vatikani”. Që sot, në faqen e internetit të Radios sonë, mund të
konsultohet lirisht “Kronologjia e historisë së Radio Vatikanit” përpiluar me profesionalitet
e me detaje të hollësishme, nga jezuiti atë Huan Feliks Kabases, i cili ka qenë një
nga krerët e emitentes, që ka kontribuar në shndërrimin e në rinovimin e saj në vitet
’70-’80.