Միլանօ Թեմի նոր Արքեպիսկոպոս Կարտինալ Անճելօ Սքոլայի Գահակալութիւնը։

Կիրակի 25 սեպտեմբերին, կարտինալ Անճելօ Սքոլա, Միլանօ թեմի նոր առաջնորդը, պաշտօնապէս մուտք գործեց իր թեմը։
Արարողութեան մասնակցեցան Լոմպարտիա մարզի եկեղեցական ու քաղաքական բոլոր իշխանութիւնները։
Նոր առաջնորդը, նախկին առաջնորդ կարտինալ Թեթթամացիի ընկերակցութեամբ՝ զանգակներու ղօղանջումով ու հաւատացեալներու ծափողջոյներով, մուտք գործեց աթոռանիստ եկեղեցի։ Կարտինալ Սքոլա աւագ խորանէն օրհնեալ ջուր սրսկեց ներկաներուն վրայ ու օրհնեց զանոնք։
Ծիսակատարութեան սկիզբը կարդացուեցաւ Պենետիկտոս ԺԶ Քահանայապետին առաքելական թուղթը, ապա պատարագին սկիզբը նոր առաջնորդը կարտինալ Թեթթամացիի ձեռքէն ընդունեց Սան Գարլոյի պատկանած եպիսկոպոսական գաւազանը եւ մատանին եւ երանելի Յովհաննէս 23-րդ Քահանայապետին լանջախաչը։ Եպիսկոպոսական թանկարժէք Թագը թեմին նուէրն է։
Կարտինալ Անճելօ Սքոլա ծնած է Մալկրադէ (Իտալիա) 7 նոյեմբեր 1941ին։ Կուսակրօն քահանայ ձեռնադրուած է 1970-ին։ Որպէս տոքթոր իմաստասիրութեան ու աստուածաբանութեան եղած է ռեկդոր Հռոմի լատերանեան քահանայապետական համալսարանին եւ խորհրդատու Հաւատոյ, կաթողիկէ դաստիարակութեան եւ Ընտանիքի ժողովներու մօտ։ 1991ին եպիսկոպոս կը նշանակուի Կրոսեթթօ թեմին, ունենալով որպէս նշանաբան ''Քու շնորհքը բաւարար է''։
5 յունուար 2002-ին կը նշանակուի պատրիարք Վենետիկի թեմին։
2003-ին կարտինալական աստիճանի կ'արժանանայ։
Պենետիկտոս ԺԶ Քահանայապետը 29 յունիս 2011-ին զինք կը նշանակէ առաջնորդը Միլանօ թեմին եւ 21 սեպտեմբերին Սրբազան Քահանայապետին ձեռքէն կ'ընդունի պալիումը` եմիփերոնը։