Mbi 100 mijë besimtarë të pranishëm në Meshën e Papës në Frajburg. Para Zotit nuk
vlejnë fjalët, por veprat
Para Zotit “nuk vlejnë fjalët”, por veprat, nismat e kthimit dhe të fesë”. Kështu
u shpreh Papa Benedikti XVI duke komentuar shëmbëlltyrën ungjillore mbi dy bijtë e
një babai që ftoi të punonin vreshtin, marrë Ungjilli i Mateut. Para turmës së gati
mase një qind mijë besimtarëve, bashkë me ipeshkvijtë e ardhur nga të gjitha dioqezat
gjermane, Papa Ratcinger kryesoi Meshën e Shenjtë dhe lutjen e Engjëllit të Tënzot
në fushën e aeroportit të Frajburgut, në ditën e fundit të udhëtimit të 21-të apostolik
ndërkombëtar. Në ora 19,15 Papa Benedikti XVI u nis nga Gjermani drejt Romës, për
t’u kthyer në mbrëmje në Kastelgandolfo.
Një ditë me diell pranveror e shoqëroi
ngjarjen e fundit të madhe kremtuar nga Benedikti XVI në fushën e aeroportit të Frajburgut,
në kornizën e jashtëzakonshme të Pyllit të Zi. Që në orët e mëngjesit, me dhjetëra
mijëra besimtarët u mblodhën në mënyrë të rregullt në vendin e caktuar për kremtimin
e Meshës së Shenjtë dhe për lutjen e Engjëllit të Tënzot me Papën.
Para gati
njëqind mijë besimtarëve, Atin e Shenjtë Jozef Ratcinger e përshëndeti kryeipeshkvi
i Frajburgut, imzot Robert Zolltisch, i cili përkujtoi moton e këtij udhëtimi papnor
“Ku është Zoti, aty ka ardhmëri” dhe falënderoi Papën Benediktin XVI për inkurajimin
dhënë katolikëve gjermanë duke “përforcuar fenë e tyre të krishterë” e duke i ftuar
të jenë “të qëndrueshëm e të patundur në shpresën” e dashurisë së Zotit në Eukaristinë
Shenjte, në mënyrë që forca që vjen nga ajo, “të na ndihmojë në ndërtimin e një kulture
dhe të një qytetërimi të dashurisë në Gjermani e në Evropë”.
Para fillimit
të Meshës së Shenjtë, në të cilën morën pjesë edhe disa përfaqësues të Kishave ortodokse
e lindore, Benedikti XVI përshkoi gjatë në mesin e turmës së besimtarëve, të cilët
e përshëndet përzemërsisht me duartrokitje të gjata e brohoritje, veçanërisht të katolikëve
të jugut të Gjermanisë, që përbënin numrin më të madh të besimtarëve, por nuk munguan
as grupe tjera të ardhura nga Vendet e rajonit, e ndër të pranishmit shënojmë edhe
pjesëmarrjen e një grupi shqiptarësh që jetojnë në vende të ndryshme të Gjermanisë.
Homelinë
e Meshës, Papa e përqendroi mbi mundësinë që kemi për t’i dhënë një perspektivë të
krishterë realitetit të kohëve tona dhe Ungjillin e paraqiti si bazë themelore për
orientimin e jetës të të krishterëve të sotëm. “Para të gjitha sendeve të tmerrshme
që ndodhin sot në botë” - tha Papa – janë disa teologë që “thonë se Zoti nuk mund
të jetë i Gjithëpushtetshëm”. Kisha, pra, duhet t’i kundërvihet me vendosmëri e rigorozitet
këtij pohimi:
“Ne jemi të lumtur e mirënjohës që Ai është i gjithëpushtetshëm.
Por, në të njëjtën kohë, duhet të jemi të vetëdijshëm se Ai e ushtron pushtetin e
vet në një mënyrë krejtësisht tjetër e të ndryshme nga mënyra se si bëjnë njerëzit.
Ai vet i ka vu një kufizim pushtetit të tij, duke njohur e respektuar lirinë e krijesave
të tij”.
Zoti, pra, dëshiron shpëtimin e popullit të vet, por pa detyrime:
“E
për bërë në mënyrë që pushteti i përdëllimit të Tij të mund ti prek zemrat tona, lyet
gatishmëria jonë për të braktisur të keqen, për t’u ngritur në këmbë para indiferencës
e për ti dhënë hapësirë Fjalës së Tij në jetë”.
Duke iu kthyer leximeve
biblike të liturgjisë Hyjnore të kësaj së diele e posaçërisht shëmbëlltyrës së dy
vëllezërve të ftuar nga ati i tyre për të punuar në vresht, Benedikti XVI i ftoi katolikët
gjermanë të ndërmarrin një angazhim përherë e më konkret në ushtrimin e fesë
së tyre: “Nuk kanë rëndësi fjalët, por veprat, vlen kthimi në fe”, tha Papa e shtoi:
“Përkthyer
në fjalorin e kohës sonë, pohimi mund të tingëllonte pak a shumë kështu: agnostikët,
që pyesin mbi çështjen e Zotit më mirë se, që janë të shqetësuar nuk gjejnë paqe;
njerëzit që vuajnë për arsye të mëkateve tona, por e kanë vullnetin e synojnë të kenë
një zemër të pastër, janë më afër Mbretërisë së Hyjit se sa janë besimtarët e ‘zakonshëm’
e të ‘rregullt’, që në Kishë shohim vetëm një vegël apo një instrument, sepse zemra
e tyre nuk preket e nuk përshkohet nga feja”.
E pikërisht duke marrë shkas
nga ky reflektim, Benedikti XVI i lëvdoi pasuritë e institucioneve baritore, shoqërore
e bamirëse të Kishës në Gjermani, në të cilat, thotë, “dashuria për të afërmin konkretizohet
e zbatohet në një formë, e cila edhe nga pikëpamja shoqërore është efikase e madje
shkon në të gjitha skajet e tokës”, por rrezikon të jetë një impenjim jo i plotë nëse
harrojmë themelin e mësimit të Jezusit:
“Zemra e hapur, që përshkohet nga
dashuria e Krishtit, që i jep të afërmit, që ka nevojë për ne, më shumë se një shërbim
teknik: ajo i jep dashurinë, në cilën tjetrit i tregon në mënyrë të dukshme Zotin
që e do, Krishtin”.
Përtëritja e Kishës, në analizën e fundit, vijoi Benedikti
XVI, mund të realizohet vetëm përmes gatishmërisë për t’u kthyer tek Zoti e përmes
fesë së ripërtërirë e të përfocuar:
“Kisha në Gjermani do të vazhdojë të
jenë bekim për bashkësitë katolike botërore, nëse mbetet besnikërisht e bashkuar me
Pasardhësin e shën Pjetrit e të Apostujve, nëse kujdeset dhe kultivon në mënyrë e
fusha të ndryshme bashkëpunimin me Vendet e misioneve dhe nëse ‘përshkohet’ nga gëzimi
i vërtetë në fenë e Kishave të reja”.
Bashkimi e universaliteti i Kishës,
pra, janë tiparet që Kisha gjermane duhet ti ketë si objektiv për të vijuar “të jetë
bekim për bashkësitë katolike të botës”. Përgjigjja pozitive, ‘po-ja’ thënë Zotit
nga ana e çdo katoliku – ripohoi Papa në reflektimin e tij gjatë Lutjes së Engjëllit
të Tënzot në mbarim të Meshës Shenjte – mbetët shtyllë mbi të cilën ndërtohet e mbështetët
feja jonë:
“Atëherë, edhe në jetën tonë dashuria e Zotit do të bëhet gati
mish, do të mishërohet, do të marrë përherë më shumë formë. Nuk duhet të kemi frikë
në mesin e të gjitha shqetësimeve, sepse Zoti është i mirë”.
Pas Meshës
së Shenjtë, Papa drekoi në Seminarin e Frajburgut me 90 ipeshkvij gjermanë pasi që
me 27 ipeshkvijtë ordinarë të dioqezave e kryedioqezave të Gjermanisë janë ftuar edhe
ipeshkvijtë ndihmës dhe të pensionuar.
Sot pasdite, në programin e ditës së
fundit të vizitës apostolike shtetërore të Papës ishte takimi i tij me gjyqtarët e
Gjyqit Kushtetues Federal dhe takimi me katolikët e impenjuar në Kishë e në shoqëri.
Takime këto domethënëse që përmbyllin e përfundojnë këtë udhëtim të tretë e të jashtëzakonshëm
të Papës Ratcinger në atdheun e tij. Më hollësisht mbi ditën e katërt e të fundit
të vizitës së Papës në Gjermani, të ndjekim shërbimin e gazetarit Albert Bisaku.....