Кіраўнік Залі Друку
Апостальскай Сталіцы і дырэктар Ватыканскага радыё кс. Фэдэрыко Ламбардзі ў сваёй
штотыднёвай рубрыцы “Octava Dies” прапануе паразважаць аб будучыні экуменізма, абапіраючыся
на разважанні Бэнэдыкта XVI прымоўленыя падчас візіта ў Германію.
“Знаходзячыся
ў Берліне немагчыма не адчуць цяжару самай чорнай старонкі мінулага стагодзя ў гісторыі
Германіі і Еўропы: гадоў нацызма з яго вар’яцкай ўладай і забойствамі”,- адзначае
кс. Ламбардзі. Ён падкрэслівае, што “памяць аб гэтым прысутнічае ў словах Папы немца,
які перад сваім народам, цытуе словы св. Аўгустына аб “бандзе разбойнікаў”, якой
становіцца дзяржава, калі адмаўляецца ад законаў і справядлівасці, або калі, падчас
сустрэчы з прадстаўнікамі яўрэйскай супольнасці, нагадвае аб злачынным планаванні
Галакосту, прарочым знакам, якога была “Крыштальная ноч” у 1938 г.”.
“Успамін
аб гэтым перыядзе найлепш выражае падарунак, які ахвяравала Папе Берлінская дыяцэзія:
выява акна змрочнай турмы у Плотцэнсэ, у якой нацысты забілі больш за 3 тыч. апазіцыянераў”,
- узгадаў кс. Ламбардзі.
Дырэктар Ватыканскага радыё звяртае ўвагу на тое,
што менавіта мучанікі эпохі нацызма з’яўляюцца святлом, якое працягвае свяціць і натхняць
у працэсе будавання будучыні. “Прэзідэнт Федэратыўнай Рэспублікі Германія ўзгадаў
аб трох з із: аб Ліхтэнбергу, пробашчу каталіцкай катэдры у Берліне; Бонгоферу, вялікім
лютэранскім пастыры, і Эдыце Штайн, дачцы Ізраіля, якая стала каталіцкай законніцай
і загінула ў Асвенціме”,- нагадаў дырэктар Ватыканскага радыё.
“Экуменізм мучанікаў
з’яўляецца тым сведчаннем, з якога сучасны экуменізм павінен браць натхненне і глыбіню.
Сведчыць аб Богу і Езусе Хрысце коштам уласнага жыцця: які ж можа быць больш агульны,
трывалы і жывы фундамент, для таго, каб пачаць новы шлях ў надзеі на еднасць, якая
існавала не толькі ў нашым мінулым, але таксама і зараз стаіць перад намі?”,- адзначае
кс. Ламбардзі.