Shtypi gjerman ndryshon gjykimin e vigjiljes, nga skepticizmi në entuziazëm.
Shtypi gjerman: Papa “i gjelbërt” çuditi të gjithë. Fjalimi, që mbajti dje Papa Benedikti
XVI para Bundestagut, u vlerësua shumë nga shtypi gjerman, i cili vë në dukje sidomos
aspektin ekologjik, të prekur nga Ati i Shenjtë. Me titullin “Me një mesazh të
gjelbërt”, gazeta “Berliner Zeitung” shkruan se “Papa na jep gjithnjë emocione të
forta”, duke shtuar se “me një oratori të rrallë, Papa e mori lëvizjen ekologjiste
si dëshmitare të këndvështrimit të pamjaftueshëm thjesht pozitivist të botës”. Konservatorja
“Die Welt” shkruan së Papa “çuditi si përkrahësit e vet, ashtu edhe kundërshtarët…
Atyre që e shihnin si një rojtar kokëfortë e kërkues të ortodoksisë katolike, pa sensin
e humorizmit, Papa, me fjalimin e tij, u rezervoi një shaka të hollë”. Në një
koment, të titulluar “Papa i gjelbërt e iluminist”, progresistja “Sueddeutsche Zeitung”
nënvizon se Kisha Katolike romake ka gjithmonë shumë forcë e se “fjalimi i Papës ishte
përjekje për t’u pajtuar me Iluminizmin”. E përditshmja vëren se Benedikti XVI e meriton
vëmendjen e treguar për të, sepse “mbajti një fjalim të madh e njerëzor, një leksion
impresionues të filozofisë së të drejtës. Ishte fjalim themelor, aspak fondamentalist”. Gazeta
konservatore “Frankfurter Allgemeine Zeitung” shkruan se “para mesazheve të dhëna,
mund vetëm të mrekullohemi për kundërshtimet, që iu rezervuan që në fillim pranisë
së tij në Bundestag”. Gazeta e shpjegon këtë me faktin se “në vendin e protestantizmit
fetar e të atij politik të përhershëm, në atdheun e individualizmit të përhapur, vërtet
kjo nuk është çudi”.