Халдэйскі арцыбіскуп: пад пагрозай культурны плюралізм на Блізкім Усходзе
Халдэйскі арцыбіскуп
Кіркута Луіс Сако адзначыў, што арабская вясна і вялікія перамены на Блізкім Усходзе
паўплывалі на тое, што ў краінах гэтага рэгіёну пад пагрозай знаходзіцца культурны
плюралізм, якія існаваў на працягу стагоддзяў, паведамляе агенства “AsiaNews”.
Арцыбіскуп
Сако падкрэсліў, што хрысціяне у Іраку, мусульманскай дзяржаве, жылі мірна на працягу
чатырнаццаці стагоддзяў. “Сёння сітуацыя змянілася. Ісламскі фундаменталізм умацоўваецца
і становіцца больш трывожным фенаменам. Фундаменталісты жадаюць, каб ісламскія законы
Шарыяту сталі асновай для грамадзянскага права і служылі абаронай іх рэлігійнай і
этнічнай ідэнтычнасці”, - расказаў іерарх.
На думку арцыбіскупа, “арабская
вясна” прынесла моцнае жаданне дэмакратыі і прызнання фундаментальных правоў чалавека,
але “гэта ідэя, нажаль застаецца фармальнай і больш адпавядае тэарытычным прынцыпам,
чым канкрэтнай рэальнасці”.
Арцыбіскуп Сако падкрэсліў важнасць “аднаўлення
дыялога з мусульманскай большасцю і жыцця ва ўзаемнай павазе і годнасці”. “Толькі
такім чынам мы зможам мець давер адзін да аднаго і будаваць больш цесныя адносіны”,-
сказаў халдэйскі іерарх.