Новы кіраўнік Ордэна рыцараў Святога Гроба Ерузалемскага пачаў выконваць свае абавязкі
16 верасня Мітрапаліт
Балтімору арцыбіскуп Эдвін О’Браен пачаў выконваць свае абавязкі кіраўніка Ордэну
Святога Гробу Ерузалемскага.Урачыстасць адбылася ў сядзібе Ордэну ў Рыме. Падчас урачыстасці
асэсар Ордэна Святога Гроба Ерузалемскага арцыбіскуп Джусэппэ Дэ Андрэа перадаў арцыбіскупу
Эдвіну О’Браену ланцуг Вялікага магістра, бачны знак яго ўлады ў кіраванні Ордэнам.
“Гэты ланцуг духоўна спалучае Вялікага магістра са Святой Зямлёй. Вызначае яго абавязкі
і многа працы. Ён з’яўляецца адзінай эмблемай, якая паказвае Уваскрослага Хрыста”,-
сказаў арцыбіскуп Дэ Андрэа.
Арцыбіскуп О’Браен выказаў падзяку Папе за тое,
што паклікаў яго да гэтага новага служэння для Касцёла, асабліва для Святой Зямлі,
у якой “60 гадоў таму хрысціяне складалі 30% усіх жыхароў рэгіёна, а сёння іх толькі
2%”. З-за таго, што Вялікім магістрам можа быць толькі кардынал, арцыбіскуп О’Браен
будзе мець тытул пра-вялікага магістра Ордэна.
Арцыбіскуп Эдвін О’Браен нарадзіўся
ў 1939 г. ў Нью Ёрку. У 1965 г. атрымаў святарскае пасвячэнне. У 1976 г. атрымаў тытул
дактара маральнай тэалогіі на Папскім універсітэце св. Тамаша Аквінскага. У 1996 г.
папа Ян Павел ІІ удзяліў яму біскупскую сакру, а ў 2007 г. папа Бэнэдыкт ХVI надаў
яму тытул арцыбіскупа. Ён замяніў на гэтай пасадзе кардынал Джона Патрыка Фолі.
Ордэн
рыцараў Святога Гробу Ерузалемскага быў заснаваны у 1099 г. у Іерусаліме, каб бараніць
гроб Хрыста і даглядаць за пілігрымамі, якія прыбывалі да Святой Зямлі. Цяпер Ордэн
з’яўляецца асацыяцыяй духавенства і свецкіх асоб. Дзейнічае ў 40 краінах свету.