Shqipëri: është shpërndarë materiali për regjistrimin e popullsisë
Në Shqipëri INSTAT pohon se ka përfunduar shpërndarjen e të gjithë bazës materiale
në çdo qark të vendit për regjistrimin e popullsisë. Qëllimi kryesor i Regjistrimit
të Popullsisë dhe Banesave është të japë një panoramë aktuale dhe të saktë të realitetit
demografik, ekonomik dhe social në vend. Drejtorja e projektit "Census 2011", pranë
INSTAT-it, Elda Kapllani, sot gjatë një seminari për prezantimin e metodologjisë për
regjistrimin e popullsisë dhe banesave, tha se "tashmë ka mbërritur edhe në komunën
më të largët e gjithë baza materiale për regjistrimin e popullsisë". Përfaqësuesi
i Bashkimit Europian, Francois Begeot, tha se Censusi është një ndër përpjekjet më
të mëdha që bën një komb në kohë paqeje. "Hartimi i pyetësorit është bazuar në rekomandimet
e EUROSTAT dhe Kombeve të Bashkuara", tha Begeot. Sipas tij, BE kontribuon në fushën
e statistikave në Shqipëri sepse të dhënat dhe statistikat zyrtare luajnë një rol
thelbësor në shoqërinë e sotme. Regjistrimi i Përgjithshëm i Popullsisë dhe Banesave
është numërimi i plotë i të gjithë individëve, Njësive Ekonomike Familjare dhe Banesave,
destinacioni i të cilave është banimi. Qëllimi kryesor i Regjistrimit të Popullsisë
dhe Banesave është të japë një panoramë aktuale dhe të saktë të realitetit demografik,
ekonomik dhe social në vend. Regjistrimi jep një fotografim të momentit mbi gjendjen
sociale dhe nivelin e jetesës së popullsisë në një moment të dhënë (Momenti kritik
i Regjistrimit). Vetëm regjistrimi mund të sigurojë të dhëna kaq të plota dhe të detajuara
dhe rezultatet e tij janë jetësore për politikën dhe marrjen e masave efektive. Ky
projekt kap vlerën e 14 milionë eurove, nga të cilat 8 milion mbulohen nga Komisioni
Evropian. Në këtë proces do të angazhohen 14.302 punonjës, nga të cilët 129 supervizorë,
2330 kontrollues dhe 11.843 anketues, të cilët do të shkojnë në çdo banesë të shqiptarëve
për mbledhjen e të dhënave në terren. Të dhënat e para të censusit, i cili pritet
të nisë më 1 tetor, pritet që të dalin në fund të nëntorit ndërsa përfundimi i procesit
dhe nxjerrja e të dhënave përfundimtare, pritet të ndodhë në mes të vitit 2012. Procesi
i regjistrimit të popullsisë ose censusi ka qenë një proces i kundërshtuar, për faktin
se në formularin e regjistrimit, përfshihen feja dhe kombësia. Të dhënat e mbledhura
gjatë regjistrimit mbrohen në përputhje me legjislacionin në fuqi në Shqipëri. Hartimi
i pyetësorit është bazuar në rekomandimet e EUROSTAT dhe Kombeve të Bashkuara dhe
ai është testuar më parë në 100 familje. (nga ATSH-ja)