Papa : ipeshkvijtë e ri ti ndihmojnë besimtarët ta jetojnë plotësisht fenë në Krishtin
Ipeshkvi “nuk është njeri i vetëm”, kështu tha Papa Benedikti XVI duke folur mbi misionin
e ipeshkvi në Kishë dhe përvojën e kolegjialitetit, në fjalimin e tij drejtuar ipeshkvijve
të emëruar vitit të fundit, të cilët sot i priti në Pallatin Apostolik në Kastelgandolfo.
Të pranishëm në takimin e ipeshkvijve të ritit latin e lindor, të cilët këtyre ditëve
morën pjesë në takimin e tyre në Vatikan, edhe prefekti i Kongregatës së Vatikanit
për Ipeshkvij, kardinali Mark Ojé e prefekti i Kongregatës për Kishat Lindore, kardinali
Leonardo Sandri. Para së gjithash, Benedikti XVI i porositi ipeshkvijtë e ri të
kultivojnë “vëllazërimin ipeshkvnor”, që duhet jetuar në veprimtarinë e përditshme
për të qenë e për të “vepruar përherë në bashkim me Papën” e me “sivëllezërit” tjerë
ipeshkvij, dhe të kultivojnë miqësinë ndërmjet tyre e me meshtarët e vet. Një përshëndetje
të veçantë Benedikti XVI u drejtoi Kishave në Lindje të Mesme që “janë në vuajtje”.
Takimi i përvitshëm i Ipeshkvijve të emëruar gjatë vitit, tha Papa, më jep rastin
për të nënvizuar disa aspekte të misionit ipeshkvnor. “Sot, dua të reflektoj me ju
mbi rëndësinë e pranimit nga ana e Ipeshkvi të dhuratave e të karizmave që Shpirti
Shenjt nxit për të mirën dhe për ndërtimin e Kishës”. Prandaj, ju ftoj ta vëni
misionin tuaj “në shërbim të meshtarisë së përbashkët të besimtarëve, të rritjes së
tyre shpirtërore e të shenjtërimit të tyre”. Besimtarët, me mënyrën e tyre e në saje
të Sakramentit të Pagëzimit, marrin pjesë në meshtarinë e Krishtit. E meshtaria e
përbashkët e besimtarëve dhe meshtaria ministeriale apo hierarkike, edhe pse dallojnë
njëra nga tjera, ato janë në varësi njëra nga tjetra, pasi që njëra dhe tjera, secila
në mënyrë të vet e të veçantë, marrin pjesë në të vetmen meshtari të Krishtit. “Për
këtë arsye, Ipeshkvijtë kanë për detyrë të mbikëqyrin e të veprojnë në mënyrë që të
pagëzuarit të mund të rriten në hirin e Zotit e sipas karizmave që Shpirti Shenjt
nxit në zemra të tyre në bashkësi të krishtera”. E, si shenjë e “begatisë së
karizmave që ekzistojnë në Kishë” dhe të “unitetit kishtar të të gjithë besimtarëve
të mbledhur rreth Papës”, Benedikti XVI përmendi shembullin e Ditës botërore të Rinisë
që u mbajt në gusht në Madrid të Spanjës: “Një gjallëri që përforcon ungjillëzimin
dhe praninë e Kishës në botë”. Nga ky konstatim thirrja e Papës drejtuar prelatëve
të ri: “Pranoni pra me mirënjohje karizmat për shenjtërimin e Kishës dhe për
gjallërimin e apostullatit!”. U takon pikërisht ipeshkvijve të vlerësojnë e
të gjykojnë pastërtinë e karizmave dhe dobinë e shërbimin e tyre brenda bashkësisë
së besimtarëve. “Për këtë gjithmonë duhet të jenë qartë që asnjë karizmë nuk
mund të mos i referohet e të mos i nënshtrohet Barinjve të Kishës ..“ “..sepse
në përzemërsinë e bashkimit – përfundoi Benedikti XVI – Kisha e jep dëshminë e saj
për Jezu Krishtin, në mënyrë që bota të beson”. Pikërisht në saje të misionit të
veçantë që ka, Ipeshkvi duhet të përkujdeset për ushqimin shpirtëror të jetës. Ai
“në saje të sakramenti të Urdhrit meshtarak, është mësues, shenjtërues e Bari që vepron
në emër e në personin e Krishtit”.