Takim urate në hapjen e Asamblesë së 66-të të Kombeve të Bashkuara në Nju Jork
Misioni i Vëzhguesit të Përhershëm të Selisë së Shenjtë dhe kryedioqeza e Nju Jorkut
kanë organizuar sot një takim urate me rastin e hapjes së punimeve të sesionit të
66-të të Asamblesë së Përgjithshme të Kombeve të Bashkuara në Nju Jork, pranë Kishës
së Familjes Shenjte, famullisë kishtare të OKB-së, në ora 17.30 lokale. Në këtë
takim lutjeje do të marrin pjesë kryeipeshkvi Francis Chullikatt, Vëzhgues i Përhershëm
i Selisë së Shenjtë pranë Kombeve të Bashkuara, prifti don Bobert Robbis, famullitar
i Kishës së Familjes Shenjte e drejtor i Komisionit kryedioqezan të Nju Jorkut për
çështjet ekumenike e ndërfetare dhe Shkëlqesia e Tij zoti Ban Ki-monn, Sekretar i
Përgjithshëm i OKB-së. Pas leximit të mesazhit të Kryeipeshkvit të Nju Jorkut imzot
Timothy Dolan, nga ana e ipeshkvit ndihmës Dennis Sullivan, do të bekohet një portret
i të Lumit Gjon Palit II, e me këtë rast do të propozohen fjalimet e Papës Wojtila
që u shqiptuan pranë Asamblesë së Përgjithshme më 2 tetor të vitit 1979 dhe më 5 tetor
të vitit 1995. Në lutjet e besimtarëve, gjatë këtij momenti shpirtëror, do të
ketë një lutje të posaçme për Atin e Shenjtë Benedikti XVI, liderët e Kombeve, Presidentin
e Asamblesë së Përgjithshme dhe Sekretarin e Përgjithshëm të OKB-së; pjesëmarrësit
e këtij takimi shpirtëror do ti lutën Zotit në mënyrë të veçantë për dhuratën e paqes
për familjes e madhe njerëzore, për paqen në çdo vend pune e në çdo bashkësi njerëzore.