Figurja e Zojës iu dhurua katedrales së Ankonës në vitin 1615, nga një marinar venedikas,
si falenderim për shpëtimin e të birit nga stuhia në det. Që atëherë, figurja është
objekt devocioni të thellë nga ana e besimtarëve. Disa kronistë flasin për një mrekulli,
në mbrëmjen e 25 qershorit 1796, para disa besimtarëve që po thoshnin litanitë e Zojës.
Sipas këtyre kronikave, Zoja e figures hapi sytë e buzëqeshi për disa ditë me radhë.
Në atë periudhë, në qytet ishte përhapur lajmi i fitores së Napoleon Bonapartit dhe
i nënshkrimit të armëpushimit, që parashikonte kalimin nën Francën të Bolonjës, Ferrarës
dhe Ankonës. Gjithashtu, francezët kishin të drejtë të konfiskonin pasuritë e Kishës.
Kështu, Kisha Katolike e interpretoi mrekullinë si shenjë mbrojtjeje kundër francezëve.
Më 11 janar 1797, Napoleon Bonaparti, sapo mbërriti në Ankonë, vendosi të mos i konfiskojë
pasuritë dhe zbukurimet e katedrales. Më 13 maj 1814, Papa Piu VII i vë kurorën figures
së mrekullisë. Në natën ndërmjet 16 dhe 17 dhjetorit 1936, figurja e Zojës Mbretëreshë
të të gjithë Shenjtorëve, e ruajtur pranë ipeshkvisë, u vodh nga të panjohur dhe u
gjet pas një muaji, pa zbukurimet e çmuara, në kapelën e Tor Mexavia në Albano Laciale.
U dërgua sërish në Ankonë më 31 janar 1937.