Kosova kërkon zbatimin e marrëveshjes për lëvizje të lirë
Kosova pret që marrëveshja me Serbinë për lëvizjen e lirë, e arritur më 2 korrik 2011,
në Bruksel, me ndërmjetësimin e BE-së, të fillojë të zbatohet shumë shpejt, sapo të
përmbyllen përgatitjet e nevojshme teknike. Zyra e shtypit e qeverisë së Kosovës,
njoftoi sot se , "më 5 shtator 2011 në Bruksel, nën kryesimin e zyrës së BE-së për
ndërmjetësimin e dialogut teknik, u mbajt takimi i radhës i grupit të ekspertëve për
zbatimin e marrëveshjes për lëvizjen e lirë mes delegacioneve nga Kosova dhe Serbia". Ndër
çështjet kryesore që u diskutuan në takim ishin modalitetet e kalimeve kufitare për
qytetarët, çështjet e tabelave të regjistrimit të automjeteve dhe zbatimi i polisave
të sigurimeve kufitare. Gjatë takimit u theksua se, "kalimet kufitare duhet të
jenë sa më të lehta dhe mos të marrin kohë në procedimin e qytetarëve nga të dyja
palët në mënyrë që qarkullimi të jetë i lirshëm dhe i papenguar, si dhe tabelat e
regjistrimeve të automjeteve, që nuk janë në përputhje me ligjet në fuqi nuk do të
lejohen të qarkullojnë në territorin e Kosovës duke filluar nga 1 nëntori 2011".
Sa i përket sigurimeve kufitare, të dyja palët ranë dakord që çmimet e polisave të
sigurimeve të automjeteve të jenë sa më të ulëta, që mos të ketë ngarkesa të panevojshme
mbi qytetarët. Me zbatimin e polisave kufitare, veturat e pasiguruara nuk do të
mund të qarkullojnë në territorin e Kosovës, ashtu siç ka ndodhur që nga viti 1999. Në
delegacionin e ekspertëve nga Kosova morën pjesë Lirim Greiçevci, (udhëheqës i delegacionit,
këshilltar i kryeministrit), Fisnik Rexhepi (këshilltar i ministrit të punëve të brendshme),
Qemajl Marmullakaj (Zyra për Planifikim Strategjik e Kryeministrit), Kolonel Shaban
Guda (Drejtor i policisë kufitare të Kosovës), Rrahim Pacolli (kryetar i Bordit të
Shoqatës së Sigurimeve) dhe Flamur Mrasori (shef i kabinetit të Guvernatorit të Bankës
Qendrore).