Бэнэдыкт XVI заклікаў змагацца са спакусамі, накіраванымі супраць веры
Сённяшняя агульная
аўдыенцыя з ўдзелам Бэнэдыкта XVI прайшла на плошчы св. Пятра ў Рыме. Папа адзначыў,
што хоча працягнуць разважанні аб малітве і на працягу наступных некалькіх аўдыенцый
засяродзіць сваю ўвагу на псальмах. Сёння Святы Айцец разважаў аб псальме 3. У ім
гаворка ідзе аб Давідзе, які вымушаны быў уцякаць ад свайго сына Авесалона. Бэнэдыкт
XVI адзначыў, што гэта адзін з самых драматычных і цяжкіх момантаў у жыцці караля:
сын займае яго трон і прымушае пакінуць Іерусалім. “У плачы псальміста, кожны чалавек
можа пазнаць пачуццё болю, горычы і даверу да Бога, які згодна з біблійным апавяданнем
суправаджае Давіда падчас бегства са свайго горада”, - сказаў Папа.
Бэнэдыкт
XVI адзначыў, што негледзячы на пераслед, Давід падтрымлівае моцны кантакт з Богам
і менавіта Бог, з’яўляецца першым да каго Ён звяртаецца. “Ворагі імкнуцца разбурыць
гэту сувязь і аслабіць веру сваёй ахвяры: яны кажуць – няма яму збаўлення ў Богу!”,
- адзначыў Папа.
“Мне падаецца, што тут псальм закранае вельмі асабіста многія
праблемы. Мы часта паддаемся спакусе думаць, што нават Бог нас не збавіць, не ведае
і не дасць больш магчымасці. Спакуса супраць веры, гэта апошні нападак ворага і яму
мы павінны супрацьстаяць – такім чынам знойдзем Бога і жыццё”.
Папа заўважыў,
што Давід звяртаецца да Бога ведаючы, што толькі Ён можа дапамагчы. “У малітве важна
захоўваць упэўненасць ў прысутнасці Бога”, - сказаў Святы Айцец. Пантыфік падкрэсліў,
што пасля шчырага зварота да Бога, Давід атрымаў унутраны супакой і нават заснуў.
“Каля яго ворагі разбілі лагер, акружаюць, збіраюцца вакол, спакушаюць здацца,
але ён застаецца спакойным і нават кладзецца спаць з упэўненасцю ў прысутнасці Бога.
Калі прачынаецца, то знаходзіць Яго побач з сабой, як ахоўніка, які не спіць, які
яго падтрымлівае, трымае за руку і не пакіне ніколі. Страх смерці пераможаны прысутнасцю
таго, хто несмяротны".
Папа адзначыў, што псальм заканчваецца збаўленнем Давіда:
“ворагі, якія праз сваю несправялівасць і жосткасць, з’яўляюцца сімвалам ўсяго таго,
што супрацьстаіць Богу і яго плану збаўлення былі пераможаны. “Молячыся гэтым псальмам,
мы можам зрабіць нашымі пачуцці псальміста, справядлівага чалавека, які знаходзіць
у Езусе сваё суцяшэнне. У цярпенні, небяспецы, горычы, неразуменні і падчас пераследу,
словы псальма адкрываюць нашы сэрцы на упэўненасць, што паходзіць з веры. Бог заўсёды
побач, нават падчас цяжкасцяў, праблем, цёмных момантаў нашага жыцця – ён чуе, адказвае
і збаўляе сваім чынам”, - сказаў Бэнэдыкт XVI.
Cённяшняя аўдыенцыя была першай,
у часе летняга адпачынка Святога Айца, якая прайшла на плошчы св. Пятра ў Рыме. Пасля
яе заканчэння Папа на верталёце вярнуўся ў Кастэль Гандольфа, летнюю рэзідэнцыю Рымскіх
Пантыфікаў, дзе працягне свой адпачынак.