«Հայաստանի Հանրապետութիւն / Սփիւռք Գործակցութիւն. Երէկ, Այսօր Եւ Վաղը» Նիւթով Գիտաժողով
Պէյրութի Մէջ։
Երկուշաբթի, 5 սեպտեմբերի ( 2011) երեկոյեան, Պէյրութի Հայկազեան համալսարանին մէջ տեղի
ունեցաւ Հայաստանի հանրապետութեան սփիւռքի նախարարութեան, Հայկազեան համալսարանին եւ
Երեւանի պետական համալսարանին կողմէ կազմակերպուած «Հայաստանի Հանրապետութիւն-սփիւռք
գործակցութիւն. երէկ, այսօր եւ վաղը» նիւթով գիտաժողովին պաշտօնական բացումը, որուն մասնակցեցան
հայ կաթողիկէ համայնքէն՝ արհի. Վարդան եպս. Աշգարեան, գերյ. Անդրանիկ ծ.վ. Կռանեան եւ
տէր Րաֆֆի քհնյ. Յովհաննէսեան: Հայաստանի սփիւռքի նախարար Հրանուշ Յակոբեանին եւ Երեւանի
պետական համալսարանի նախագահ դոկտ. Արամ Սիմոնեանին յատուկ շնորհակալութիւն յայտնելէ
ետք Հայկազեան համալսարանի նախագահ վեր. դոկտ. Փոլ Հայտոսթեան յայտարարեց, որ Հայկազեան
համալսարանին մէջ հաստատուած է եւ 2011-2012 տարեշրջանին պիտի սկսի գործել Հայկական սփիւռքի
ուսումնասիրութեանց կեդրոն, որուն հիմնական կեդրոնացումը պիտի ըլլայ Միջին Արեւելքի վրայ: