Vazhdojnë ndeshjet ndëretnike në rajonin e Josit në Nigerinë qendrore. Që nga dita
e hënë, numri i viktimave ka arritur në 50 vetë. Njëri kundër tjetrit qëndrojnë një
grup etnik i krishterë dhe një tjetër mysliman. Por, shkaku i dhunës nuk është vërtet
fetar, siç thotë në mikrofonin tonë kryeipeshkvi i Josit, imzot Ignatius Ayau Kaigama: Autoriteteve
u intereson të thonë se krejt kriza është shkaktuar nga motive fetare. Nuk e mohoj
se të krishterët e myslimanët po luftojnë kundër njëri-tjetrit, por faktorët që e
kanë ushqyer këtë krizë janë kryesisht me karakter etnik dhe ekonomik e, i kanë rrënjët
thellë në realitetin historik të rajonit. Ndër shkaqet, është lufta për pushtetin
politik lokal dhe për kontrollin e zonave bujqësore më pjellore. Duhen gjetur me urgjencë
zgjidhje, por kjo nuk bëhet. Autoritetet sillen si struci, që e fsheh kokën në rërë,
duke shpresuar se problemet do të kalojnë, por kjo nuk ndodh e nëse nuk zgjidhen çështjet,
të rinjtë do të bien gjithnjë e më tepër në dëshpërim e do të bëhen gjithnjë e më
të dhunshëm. Ç’po bëni ju si Kishë Katolike? Duhet të krijojmë një atmosferë
miqësie e solidariteti ndërmjet nesh e myslimanëve. Këtë po përpiqemi të bëjmë si
Kishë. Kemi marrë kontakte me krerët islamikë dhe së bashku me ta, kemi bërë thirrje
për fundin e dhunës. Krerët myslimanë i janë përgjigjur shumë pozitivisht iniciativës
sonë, pasi edhe ata janë të shqetësuar për të rinjtë, të cilët po asimilojnë kulturën
e dhunës e të vdekjes, në vend të kulturës së dashurisë.