Liturgjia e Fjalës e dielës së 23-të gjatë vitit kishtar ‘A’
Ja përsëri në takimin tonë javor të së shtunës me Fjalën e Zotit të meshës së dielës,
kësaj here do të dëgjojmë e meditojmë së bashku leximet biblike të liturgjisë së Fjalës
Hyjnore të dielës së 23-të gjatë vitit kishtar, ciklit të parë, sipas kalendarit liturgjik
të kishës. Bashkësia e besimtarëve rritet e përforcohet me gjeste konkrete të dashurisë:
ndreqjen apo korrigjimin vëllazëror dhe uratën. Leximet biblike të kësaj së diele
na paraqesin përmasën kishtare në brendësinë e saj, duke pasur parasysh marrëdhëniet
e anëtarëve të Kishës. Misteri i Kishës jetohet e përjetohet në nivele të ndryshme
të strukturës së saj të dukshme, pra të jashtme, por përgjithësisht realizohet në
dashurinë e jetës që karakterizon sjelljet e secilit në marrëdhëniet e përditshme
të jetës së tij. Bashkësia fetare rritet me gjestet konkrete të dashurisë së çdo anëtari:
përmes korrigjimit apo ndreqjes së gabimeve vëllazërore dhe lutjes. Çdo korrigjim
i vërtetë i vëllait dhe të afërmit tonë, pra i tjetrit duhet të buron vetëm nga dashuria
që ia kemi borxh vëllait e të afërmit tonë, e këtë detyrë të ushtrimit të dashurisë
së korrigjimit ndaj vëllait që gabon e mëkaton, duhet ta bëjmë me ndërgjegjësim njerëzor
e të krishterë. Tërheqjen e vërejtjes e korrigjimin e tjetrit, gjithmonë duhet ta
kryejmë me plotë përvujtëri e me dashuri ungjillore. Jezusi në Ungjillin e kësaj së
diele na tregon edhe mënyrën e korrigjimit e na thotë se në dialogun vetëm për vetëm
me vëllain, është e mundur ta “shpëtosh” ” vëllain tënd nga gabimi e nga mëati, që
do të thotë ta fitosh përsëri, ta ri-kthesh bashkimin e jetës dhe harmoninë me vëllain
që ka gabuar e mëkatuar. Kështu pra, mund të themi se tema qendrore e leximeve
biblike të kësaj së diele është miqësia dhe vëllazërimi ndërmjet të gjithë anëtarëve
që formojnë e përbëjnë bashkësinë njerëzore dhe atë kishtare të besimtarëve. Pra leximet
biblike të kësaj së diele na ofrojnë për meditim dhe udhëtim shpirtëror për rregullimin
e marrëdhënieve tona të ndërsjellët në jetën e përditshme në familje, në bashkësi
fetare e shoqërore: dashurinë dhe qortimin vëllazëror. Çdo i krishterë e ka për
detyrë këtë urdhër të dashurisë e të qortimit vëllazëror të anasjelltë, sepse ne jemi
anëtarë të të njëjtit trup mistik të Krishtit, që është Kisha, dhe për organizmin
e funksionimin sa më të mirë të një bashkësie, nuk është punë indiferente nëse një
anëtar i saj e dëmton apo lëndon vetveten me gabime e me mëkate, sepse në atë mënyrë
e prekë edhe jetën e të gjithë anëtarëve të tjerë të bashkësisë njerëzore e fetare.
Qortimi, e nëse është nevoja edhe korrigjimi i tjetrit, mund e duhet të bëhet, por
gjithmonë duhet bërë në atë mënyrë që na porosit Krishti në Ungjill, duke synuar përherë
rifitimin, kthimin e të afërmit e të vëllait tonë, pra pajtimin dhe e assesi, gjykimin
e tjetrit e dëbimin e tjetrit. Kurrë pa tjetrin. Në leximin e parë nga Ezekieli
profet, Zoti na thotë: ty të kam vënë si rojtar e si zë për vëllezërit tu. Në leximin
e dytë të kësaj së diele Palit na kujton se: “keni vetëm një detyrim atë të dhurimit
të dashurisë reciproke” . E tani ju ftojmë ti dëgjojmë leximet biblike të liturgjisë
së Fjalës Hyjnore të dielës së 23-të gjatë vitit kishtar, së bashku me homelinë… Liturgjia
e Fjalës së Zotit
Leximi i parë (Ez 33, 7-9) Nëse ti nuk i flet
të patenzonit, unë do të kërkoj gjakun e tij prej dorës sate kur ai të vdesë.
Lexim
prej Librit të Ezekielit profet
Kështu thotë Zoti: “Ty, o biri i njeriut,
unë do të kam vënë për rojtarin e shtëpisë së Izraelit. Kur ta dëgjosh një fjalë prej
gojës sime, qortoji ata në emër tim. Në qoftë se unë të them për të paudhin: ‘I paudhë
do të vdesësh!’, e ti nuk i thua që i patenzoni të largohet nga udha e tij e mbrapshtë,
i paudhi do të vdesë në fajësinë e vet, kurse unë gjakun e tij do ta kërkoj prej dorës
sate. Por, në qoftë se e qorton të patenzonin, që të kthehet nga rruga e vet e ligë,
kurse ai nuk kthehet, ai do të vdesë në fajësinë e vet, por ti e ke shpëtuar jetën
tënde.” Fjala e Zotit.
Psalmi 95 (94) Ref: O Zot, bëj që ta
dëgjojmë zërin tënd _____________________________ Ejani t’i këndojmë Zotit, t’i
brohorisim Hyjit, Shëlbuesit tonë. T’i dalim para me falënderje, t’i këndojmë
këngë hareje! _____________________________ Ejani ta adhurojmë, të biem përmbys
para tij, të biem në gjunjë para Zotit që na krijoi! Sepse ai është Hyji ynë,
ne jemi populli i kullotës së tij, grigja që ai e ruan. _____________________________ Oh
sikur ta ndienit sot zërin e tij: Mos e bëni zemrën tuaj gur porsi në Meribë, porsi
në ditë të Masës në shkretëtirë, kur etërit tuaj më vunë në sprovë: më provuan
megjithëse i kishin parë veprat e mia. _____________________________
Leximi
i dytë (Rom 13, 8-10) Dashuria është zbatimi i përsosur i Ligjit.
Lexim
prej Letrës së shën Palit apostull drejtuar Romakëve
Vëllezër, askujt të
mos i keni tjetër detyrim, përveç detyrimit që ta doni njëri-tjetrin, sepse ai që
e do tjetrin, e ka plotësuar ligjin. Sepse: ‘Mos bëj kurorëthyerje! Mos vrit! Mos
vidh! Mos lakmo!’ e nëse ka edhe ndonjë tjetër urdhër, është i përfshirë në këto fjalë:
‘Duaje të afërmin tënd porsi vetveten!’ Dashuria nuk i bën keq të afërmit. Dashuria,
pra, është zbatimi i përsosur i ligjit.
Fjala e Zotit
Ungjilli
(Mt 18, 15-20) Ne qoftë se të dëgjon, e shpëtove vëllain tënd.
Leximi
i Ungjillit shenjt sipas Mateut
Në atë kohë, Jezusi u tha nxënësve të vet:
“Në qoftë se vëllai yt mëkaton kundër teje, qortoje vetëm për vetëm. Në qoftë se të
dëgjon, e shpëtove vëllain tënd. Po qe se nuk të dëgjon, merre me vete edhe një ose
dy njerëz të tjerë, që çdo gjë të mbështetet në pohimin e dy ose tre dëshmitarëve.
Në qoftë se as ata nuk i dëgjon, tregoji Kishës. Nëse as Kishën nuk e dëgjon, mbaje
si të ishte pagan ose tagrambledhës. Përnjëmend po ju them: çdo gjë që ju të lidhni
përmbi tokë, do të jetë e lidhur edhe në qiell, dhe çdo gjë që ju të zgjidhni mbi
tokë, do të jetë e zgjidhur edhe në qiell. Prapë po ju them: nëse dy vetë prej
jush këtu mbi tokë, të një mendimi, luten për çfarëdo sendi, Ati im që është në qiell
do t’ua japë. Sepse ku janë dy ose tre të bashkuar në emrin tim, aty jam edhe unë,
midis tyre.” Fjala e Zotit!