Հոլանտացի Երեսփոխաններ Կ՝արծարծեն Հայոց Ցեղասպանութեան Հարցը ։
Հոլանտայի թագաւորութեան խորհրդարանի կուսակցութեանց երեսփոխաններ, Հայկական Ցեղասպանութեան
մասին հարցումներ յղած են երկրի արտաքին գործոց նախարար Ուրի Ռոզենթալին: Ըստ «Nouvelles
d"Armenie»ին, այդ կուսակցութիւններն են՝ Քրիստոնէական Միութիւնը, Ընկերվարական Կուսակցութիւնը,
Բարեկարգչական Կուսակցութիւնը եւ Յանուն Աազատութեան Կուսակցութիւնը: Խորհրդարանականներուն
ուղղուած իր պատասխան նամակին մէջ, նախարար Ռոզենթալ անդրադարձած է «1915ի սարսափելի
իրադարձութիւններուն», ինչպէս նաեւ «Հայաստանի եւ Թուրքիոյ միջեւ երկխօսութեան վերսկսման
անհրաժեշտութեան», առանց օգտագործելու «ցեղասպանութիւն» եզրը: Նկատի ունենալով, որ
հոլանտացի քաղաքական գործիչները, ինչպէս նաեւ հոլանտական լրատուամիջոցները շարունակաբար
չեն խուսափած օգտագործելէ «Հայոց Ցեղասպանութիւն» արտայայտութիւնը, որ նաեւ օգտագործուած
է Հոլանտայի արտաքին գործոց նախկին նախարար եւ ներկայիս փոխվարչապետ Մաքսիմ Վերհակենի
կողմէ, խորհրդարանականներուն մօտ հարց յառաջացած է, թէ արդեօք նոր նախարարը տեղի տուա՞ծ
է Թուրքիոյ ճնշումներուն: Նշուած կուսակցութիւններուն ներկայացուցիչները պահանջած են
նախարարէն, որ բացատրէ, թէ ինչո՞ւ ան չ՛օգտագործեր «ցեղասպանութիւն» բառը, եւ անոր փոխարէն
կ՛օգտագործէ «իրադարձութիւններ» բառը: Կուսակցութիւններուն ներկայացուցիչները յիշեցուցած
են, որ երկրի խորհրդարանը միաձայնութեամբ որոշած է, թէ «Կառավարութիւնը Թուրքիան Եւրոմիութեան
անդամ դարձնելու բանակցութեանց ընթացքին Հայոց Ցեղասպանութեան ճանաչման հարցը օրակարգի
վրայ պէտք է դնէ»: Անոնք նաեւ հարց տուած են, թէ արդեօք Ռոզենթալ կը փափաքի՞ քննել
Լա Հէյի կից Հայոց Ցեղասպանութեան զոհերու յիշատակին նուիրուած յուշարձանի կառուցման
հարցը: Նախարար Ռոզենթալ գրած է, որ կառավարութիւնը համաձայն չէ Միջազգային քրէական
դատարանին մօտակայքը նման յուշարձան մը կառուցելու գաղափարին: