Кардынал Бэртонэ: праца можа быць шляхам да святасці
2 верасня ў Кастэль
Гандольфа прайшла сустрэча Хрысціянскіх асацыяцый працаўнікоў Італіі, у працы якой
прыняў удзел кардынал Дзяржсакратар Тарчызіо Бэртонэ. Іерарх перадаў удзельнікам форума
прывітанне Святога Айца і адзначыў, што Папа вельмі высока цэніць дзейнасць хрысціянскіх
аб’яднанняў працаўнікоў.
З свайго боку кардынал Бэртонэ, падкрэсліў, што сацыяльнае
навучанне Касцёла прапанавала свету “інтэгральна-гуманістычнае” разуменне працы. “Біскупы
ва ўсім свеце, у адзінстве з Папам, перадаюць “Евангелле працы” людзям, не толькі
словамі, але таксама праз пастрыскі клопат, які здзяйсняюць шматлікія святары, законнікі
і свецкія, што перакладаюць Навучанне ў чыны”, - сказаў іерарх.
Кардынал Дзяржсакратар
падкрэсліў, што Папа Бэнэдыкт XVI у сваёй энцыкліцы “Caritas in veritate” заклікае,
каб бескарыснасць і “логіка дара”, увайшлі ў сучасную эканоміку, як выраз братэрства
ўсіх людзей.
“Глядзець на працу з гэтай перспектывы азначае бачыць ў ёй не
толькі занятасць ці кар’еру, але перш за ўсё “пакліканне”, нешта, блізка звязанае
з самым асабістым і важным у сэнсе жыцця чалавека”, - сказаў кардынал Бэртонэ. “Нават
больш за тое. Праца, можа стаць шляхам да святасці, калі выконваецца як воля Бога”,
- падкрэсліў іерарх.
Кардынал звярнуў увагу на неабходнасць “цывілізаванасці
ў эканоміке”, перад абліччам сучасных спекулятыўных тэндэнцый. “Эканоміка не можа
памяншаць сацыяльную каштоўнасць прадпрыемстваў і адказнасць за сем’і працаўнікоў,
за грамадства і навакольнае асяродзе. Гэты выклік патрабуе моцнай маральнай сумленнасці,
якая грунтуецца на пастаянных і надзейных адносінах з Богам”, - падкрэсліў іерарх.