Atë Picabala e imzot Shomali: mos kini frikë të shtegtoni në Tokën Shenjte.
“Ejani në Tokën Shenjte! Nuk ka kurrfarë rreziku! Jeruzalemi i pret gjithnjë me krahë
hapur bijtë e vet” – kjo është thirrja e Rojtarisë së Tokës Shenjte, pas rënies së
ndjeshme të numrit të shtegtarëve gjatë katër muajve të fundit. Shkaku i këtij pakësimi
duhet kërkuar tek kriza ekonomike e, posaçërisht, tek mungesa e stabilitetit në Lindjen
e Mesme. Por, kujtojnë zërat autoritare, që përhapen nëpër botë nga Toka Shenjte,
shtegtarët nuk duhet të kenë frikë. E këtë e thekson edhe Rojtari i Tokës Shenjte,
atë Pierbatista Picabala, me telefon, nga Jeruzalemi:
Përgjigje:
- Deri në maj, numri i shtegtarëve ishte shumë i madh, shumë më i madh
se vitin e kaluar. Pastaj, pak nga pak, me krizën ndërkombëtare por edhe, e sidomos,
me ndryshimet në botën arabe, u ndje një rënie e menjëhershme, që vijon të thellohet
edhe sot e kësaj dite. Kjo krijon jo pak shqetësim, posaçërisht në gjirin e bashkësisë
së krishterë, sepse për këtë bashkësi, prania e shtegtarëve është burimi kryesor i
jetesës. Ajo që dëshirojmë të pohojmë është se, pavarësisht nga ç’po ndodh në botën
arabe, Toka Shenjte e shtegtimi në këto troje, janë krejtësisht të sigurta. Nuk ka
kurrfarë rreziku. Asnjë lloj rreziku, pra, nuk i kërcënon shtegtarët, që duan të vizitojnë
Viset e Shenjta. Nuk duhet të kenë frikë, prandaj, për të ardhur e për ta provuar
këtë përvojë, që mbetet e paharrueshme për këdo.
Pyetje: - E kjo
duhet parë jo vetëm si përvojë e jashtëzakonshme, e paharrueshme, por edhe si mbështetje
për bashkësinë e krishterë të Tokës Shenjte....
Përgjigje: -
Është e vërtetë, një pjesë e mirë e të krishterëve bën punë, që lidhen me shtegtimin
e me shtegtarët, në fushën e atij, që njihet me emrin “turizëm fetar”, siç e quajnë
edhe këtu, prandaj mund të themi se shtegtari, që vjen për të ecur mbi gjurmët e Jezusit,
gjë që ka shumë rëndësi, i jep edhe ndihmesën e vet, i jep mbështetjen, solidaritetin,
bashkësisë së krishterë, e cila, siç dihet nga të gjithë, është e vogël dhe gjithnjë
nevojtare për ndihmë e solidaritet. E përsëris, shtegtimi në Tokën Shenjte është absolutisht
i sigurt, nuk ka kurrfarë rreziku. Këta pak shtegtarë, që ndodhen këtu në këtë periudhë,
mund ta dëshmojnë se është një përvojë shumë e bukur, se ia vlen të shtegtosh e se
nuk duhet të trembesh fare, sepse nuk të pret asnjë e papritur, përveç të papriturave,
tepër emocionante, të ecjes në gjurmët e Besëlidhjes së Vjetër e të Re.
Me
thirrjen e Rojtarisë së Tokës Shenjte, bashkon zërin edhe Patriarkana latine e Jeruzalemit.
Në mikrofonin tonë, ipeshkvi ndihmës, imzot Uiljam Shomali, ndalet në mënyrë
të posaçme tek kontributi që jep figura e shtegtarit për paqen në Tokën Shenjte:
Përgjigje:
- Bashkohem me thirrjen e Rojtarisë së Tokës Shenjte për t’u kujtuar të
gjithëve se nuk duhet të kenë frikë. Toka Shenjte është udha e shtegtarëve, itinerari
i shtegtarëve, të cilët sot janë më të sigurt se kurrë. Vetëm paraditen e sotme pritëm
400 senegalezë, që erdhën në Patriarkanën latine e mbetën shumë të kënaqur. Shtegtarët,
që erdhën kohët e fundit, nuk pësuan asnjë dëm, përkundrazi, u kënaqën shumë. U bëjmë
thirrje të gjithë atyre, që kanë dëshirë të vijnë, por i pengon një farë frike nga
situata në vendet arabe: ejani pa frikë, ejani në Tokën Shenjte, kthejuni në këto
vise, më të fortë se kurrë!
Pyetje: - Kush niset për shtegtim në
Tokën Shenjte, bëhet edhe simbol i bashkimit me të krishterët e kësaj Toke të bekuar...
Përgjigje:
- Pikërisht! Por edhe simbol i solidaritetit me të gjithë banorët, sepse
shtegtari është simbol i paqes, figurë e mirëpritur nga të gjithë, myslimanë, të krishterë,
hebrenj, e mund të them, pa e tepruar aspak, se figura e shtegtarit është urë, që
i lidh të gjithë; shtegtari bën një vepër paqeje, e jo vetëm me lutjen e vet, por
edhe me praninë e vet në këto vise.
Pyetje: - Në Tokën Shenjte,
a ka tension lidhur me kërkesën e OKB-së për njohjen e një Shteti palestinez: cilat
janë shpresat tuaja, edhe në këtë këndvështrim, për paqen në zonë?
Përgjigje:
- Ne presim një vendim të guximshëm nga ana e Kombeve të Bashkuara. Mendoj,
prandaj, se njohja e një Shteti palestinez nga Kombet e Bashkuara, do ta kufizonte
dhunën në rajon e edhe antisemitizimin e urrejtjen, që vijojnë në të katër anët e
botës. Mendoj se është në interesin e Izraelit njohja e një Shteti të pavarur palestinez,
e në interesin e palestinezëve, njohja e të drejtave të hebrenjve për të pasur një
Shtet. Është në interesin e të gjithëve njohja e dy shteteve, që jetojnë në harmoni,
paqe e respekt reciprok.