Мадрыд: прэс-канферэнцыя аб Сусветных днях моладзі
У Мадрыдзе адбылася
прэс-канферынцыя з нагоды падвядзення вынікаў Сусветных дзён моладзі, якія прайшлі
ў іспанскай сталіцы 16-21 жніўня. “Мадрыд з’яўляецца вельмі гасцінным горадам, не
гледзячы на дзейнасць тых, хто не хоча, каб так было”, - сказаў арцыбіскуп Мадрыдскі
кардынал Руоко Варэла. Іерарх звярнуў увагу на паводзіны пілігрымаў, якія не дазволілі
сябе справакаваць праціўнікамі візіта Пантыфіка. “Маладыя людзі паводзілі сябе як
сапраўдныя хрысціяне”, - адзначыў кіраўнік іспанскага епіскапата.
Кардынал
Варэла падкрэсліў таксама, што Святога Айца вельмі ўразіла моладзевае чуванне на тэрыторыі
аэрапорта “Cuatro ventos”. “Ён нават не захацеў яго пакідаць у самы разгар навальніцы”,
- адзначыў іерарх. “Падчас нядзельнай св. Імшы, Папа звярнуў увагу на хор і аркестр.
Сустрэча з маладымі людзьмі з абмежаванымі магчымасцямі, была па-сапраўднаму адной
з самых хвалюючых падчас візіту Святога Айца”, - сказаў кардынал Варэла.
У
размове з журналістамі арцыбіскуп Мадрыда адзначыў, што яго асабіста вельмі ўразіла
сустрэча Папы з універсітэцкімі выкладчыкамі. “Бачыць прафесароў і выкладчыкаў, якія
станавіліся на крэслы, каб прывітаць Святога Айца, было вельмі незвычайна”, - сказаў
іерарх.
“Нам вельмі важна дапамагчы арганізатарам форума ў Рыа-дэ-Жанэйра,
каб яны не дапусцілі некаторых памылак, які зрабілі мы”, - сказаў падчас прэс-канферэнцыі
Яга дэла Сіерва, выканаўчы дырэктар ХХVI Сусветных дзён моладзі.