Arrestime të reja meshtarësh e besimtarësh katolikë në Kinë. Lajmi jepet nga agjensia
misionare “AsiaNews”. Janë anëtarët e bashkësisë katolike të Tianshuit, në zonat qendrore
të veriut, të cilëve u janë hedhur prangat në fundin e javës së kaluar. Ndër të arrestuarit,
administratori i dioqezës, ipeshkëv nderi(pra, në pension), shumë meshtarë e dhjetra
përgjegjës laikë. Ipeshkvi është arrestuar së bashku me dy vëllezërit e vet, edhe
ata meshtarë, por mbahen në dy vende të ndryshme e u nënshtrohen sesioneve të riedukimit
politik, sipas traditës së njohur të propagandës komuniste. Deri tani, dioqeza
e Tianshuit, në të cilën jetojnë rreth 20 mijë katolikë, ka pasur marrëdhënie të qeta
me policinë e me autoritetet. Por, meqenëse posti i ipeshkvit është ‘vakant’, Pekini
dëshiron t’u imponojë një kandidat të vetin, të pëlqyeshëm për qeverinë. Arrestimet
e këtyre ditëve tregojnë se popullsia nuk është përkulur para pretendimeve të qendrës
komuniste, megjithëse edhe para disa muajsh, u arrestuan dy kandidatë të Vatikanit
për vendin e ipeshkvit, mbi të cilët është përdorur dhuna për t’i bindur të heqin
dorë nga besnikëria ndaj Papës. Katolikët e dioqezës së Tianshuit i kërkojnë gjithë
botës të lutet për lirimin e meshtarëve dhe të besimtarëve të burgosur.