Nunci apostolik në Gjermani: “Vizita e Papës do të sjellë shpresë e forcë për ungjillëzimin
e ri”
Katër ditë pas përfundimit të Ditës Botërore të Rinisë në Madrid, që u quajt nga Benedikti
XVI “një ngjarje kishtare emocionuese”, pritet udhëtimi i ardhshëm ndërkombëtar i
Papës. Nga data 22 deri më 25 shtator, Ati i Shenjtë do të shkojë në Gjermani për
vizitën e tij të 21-të apostolike jashtë Italisë. Në një intervistë për agjencinë
katolike KNA, nunci në Gjermani, imzot Zhan-Klod Perisé pohon se Papa do të sjellë
shpresë e forcë për ungjillëzimin e ri. “Kisha – nënvizon nunci – duhet të shpallë
mesazhin e Krishtit dhe Papa dëshiron ta inkurajojë Kishën ta çojë deri në fund këtë
detyrë. E jam i sigurtë se do t’ia arrijë kësaj”. Duke u ndalur pastaj në etapat
e udhëtimit – Berlini, Erfurti, Ecelbahu dhe Friburgu – nunci thekson: “Programi tregon
se Benedikti XVI do të vizitojë Gjermaninë e bashkuar, së pari kryeqytetin, pastaj
Erfurtin, e cila është dioqezë e ish-Republikës Demokratike Gjermane, ku Kisha arriti
ta ruajë fenë gjatë regjimit komunist e ku ndodhet edhe Seminari, që kardinali Racinger
ka vizituar në të kaluarën. Së fundi, Papa do të shkojë në perëndim të vendit, në
Friburg”. Ndër çastet më të rëndësishme të udhëtimit, imzot Perisé nënvizon në
veçanti dy ngjarje, që do të zhvillohen gjatë pasdites së 22 shtatorit, në Berlin:
vizita e Papës në Parlamentin Federal dhe Mesha e Shenjtë, kremtuar nga Benedikti
XVI në stadiumin Olimpia. Përsa u përket zërave për protesta të mundshme, imzot Perisé
pohon: “Njerëzit kanë të drejtë të manifestojnë. Uroj vetëm që manifestimet të mos
marrin nëpër këmbë vlerat e fesë, por të respektojnë besimin e Kishës Katolike. Ne
kërkojmë të njëjtin respekt, që do të kishin për një përgjegjës tjetër fetar, ose
politik”. Numri i pjesëmarrësve të regjistruar për Meshën në stadiumin Olimpia
të Berlinit rritet çdo ditë e nunci nënvizon faktin se shumë katolikë nga zona të
tjera të Gjermanisë e shumë të huaj duan të marrin pjesë në këtë kremtim eukaristik.
Ky është sinjal pozitiv, që dëshmon unitetin e Gjermanisë e tregon edhe se Berlini
nuk është qytet pagan, siç thotë dikush. Kisha është e gjallë e, pavarësisht nga kritikat,
jep kontributin e vet të çmuar në shoqëri.