Takimi me të rinjtë neokatekumenalë në Madrid. Kiko Arguejo: “Fjalët e Papës sjellin
hir të veçantë për të rinjtë”
Pas Ditëve prekëse Botërore të Rinisë në Madrid të Spanjës, dje, Plaza de Cibeles
u mbush sërish me gëzimin e fenë e të rinjve: rreth 200 mijë vetë të Lëvizjes neokatekumenale
u mblodhën në një takim shpirtëror, kushtuar thirrjeve, kryesuar nga kardinali-kryeipeshkëv
i Madridit, Antonio Maria Rouko Varela. Të pranishëm edhe pesë kardinaj të tjerë e
59 ipeshkvij. Folën themeluesit e Lëvizjes, Kiko Arguejo e Karmen Hernandez, së bashku
me atë Mario Pecin. Ky takim organizohet gjithnjë pas Ditëve Botërore të Rinisë
e tashmë, është bërë traditë. Para se të shkonin në kryeqytetin spanjoll, të rinjtë
e pesë kontinenteve shpallën Ungjillin në rrugët e 500 qyteteve të Evropës e disa
prej tyre treguan ngjarje vërtet prekëse nga kjo përvojë. Në fillim të Liturgjisë
së Fjalës, të pranishmit dëgjuan një simfoni, kompozuar nga Kiko Arguejo, i cili ia
kishte kushtuar muzikën vuajtjes së të pafajshmëve. Katekizmi i tij i mëpasëm u përqendrua
në nevojën e në urgjencën e ungjillëzimit të ri. Pastaj të rinjtë u mblodhën në
lutjen, që u pasua nga deklarata e parqitja e 5 mijë të rinjve për t’u bërë meshtarë
dhe e 3.200 vajzave për t’u bërë murgesha. Por mbi përvojën e këtyre të rinjve,
që nuk kanë frikë ta shpallin në të katër anët e botës se e kanë dëgjuar thirrjen
e Zotit e kanë ndërmend t’i përgjigjen me jetën e tyre, të dëgjojmë njërin nga nismëtarët
e Lëvizjes neokatekumenale, pikërisht Kiko Arguejon:
Erdhi një grup prej
270 vetësh nga Iraku, një grup nga Palestina, që bënin pjesë në Lëvizje e që shkuan
në zona myslimane, duke kënduar: mbetëm të habitur, sepse myslimanët i pritën shumë
mirë. Gjithandej kemi pasur kthime në krishterim: një vajzë në Londër, që jetonte
në rrugë, takoi dy prej këtyre të rinjve, të cilët i folën e ajo u tregoi se i kishte
parë në ëndërr, pikërisht ata të dy… E morën me vete në bashkësi dhe e shpëtuan: ndryshoi
krejtësisht jetë. Të rinjve u kemi thënë të shkojnë sidomos nëpër fshatra, edhe në
ato më të voglat. Disa prej tyre janë shumë të varfëra, nuk kanë meshtarë e kisha
është mbyllur…Gjatë vizitës, këto fshatra shndërroheshin! Vinin të gjithë, u hapnin
shtëpitë të rinjve, i ftonin të hanin me ta e pastaj vinin në kremtimin e Eukaristisë.
Vërtet, Evropa po pret Ungjillin! Mendoj se Papa Gjon Pali II ka qenë profet e se
kjo DBR e ky takim kanë filluar ungjillëzimin e ri. Ajo, që na ka bërë më shumë përshtypje
është se ne ishim 200 mijë në Madrid, por pjesa tjetër e të rinjve – e flasim për
dy milion vetë – ishin shumë më të mirë se ne: qëndronin me orë në mes të vapës e
s’pamë asnjë të protestonte. Një gazetar thoshte: “Jeni këtu prej 6 orësh, nën 39
gradë celcius…e kënaqeni?” E të rinjtë përgjigjeshin: “Po, kënaqemi. Gjithçka ia kemi
ofruar Jezu Krishtit”. Në Meshën përfundimtare të DBR-së së Madridit, Papa
nguli këmbë mbi ungjillëzimin e ri. Lëvizja juaj e ndjen shumë këtë aspekt, apo jo? Kur
i Lumi Gjon Pali II e njohu Lëvizjen, pati thënë: “Uroj që vëllezërit e mi ipeshkvij
ta ndihmojnë këtë vepër për ungjillëzimin e ri”. Ai na tha: “Kjo është vepër për ungjillëzimin
e ri”. E tani, po fillojmë “missio ad gentes” kudo e me sukses të madh. Në
këtë takim shpirtëror, kushtuar thirrjeve, 5 mijë djem u treguan të gatshëm të ndërmarrin
rrugën e meshtarisë e 3.200 vajza, rrugën e jetës së shuguruar. Ky është një fryt
i rëndësishëm… Kurrë nuk kanë qenë kaq shumë! Besoj se ky është fryti i takimit
me Papën: kemi vënë re se kur të rinjtë dëgjojnë Papën marrin nga Zoti një hir të
veçantë. Kur i pyes të rinjtë: “Pse u ngrite?”, të gjithë më përgjigjen: “Më preku
ajo që tha Papa në këtë pikë, apo në atë pikë…”. Gjatë këtyre ditëve, fjalët e Papës
shndërrohen në hir të veçantë për të rinjtë. Ne s’bëjmë tjetër, veçse mbledhim frytet
e punës së Kishës, të punës së Benediktit XVI. Sidomos përsa i përket ungjillëzimit,
të rinjtë ndjejnë lumturi të madhe. Thonë: “Kanë qenë ditët më të lumtura të jetës
sime, dua të vazhdoj kështu!”.