Turqia vazhdon të bombardojë vendqëndrimet e simpatizantëve të Partisë së Punës së
kurdëve në veri të Irakut. Në sulmet e djeshme ajrore, humbën jetën të paktën shtatë
civilë kurdë. Operacioni pason pritën e rebelëve kurdë separatistë, që javën e kaluar
shkaktuan vdekjen e 12 ushtarëve të Ankarasë, në territorin turk. Folëm me gazetarin
italian Alberto Roseli, ekspert i zonës: Nga pikpamja
e së drejtës ndërkombëtare, kjo është pa dyshim diçka e patolerueshme. Ndërsa Iraku
përpiqet, mes vështirësish, t’i japë një farë autonomie pakicës kurde të pranishme
në territor, në zonën e Mosulit, Turqia, për të zgjidhur problemin e saj me lëvizjen
kurde, pa asnjë lloj skrupulli, bombardon bazat në një territor që nuk është i veti,
por i një kombi tjetër. A ndryshon gjë në marrëdhëniet e Turqisë me Evropën,
ku Ankaraja dëshiron të integrohet? Turqia sheh drejt Evropës, sepse ia ka
nevojën, sepse është një ekonomi në fazën e modernizimit e të shndërrimit, prandaj
ka nevojë të lidhet pas “lokomotivës” evropiane e perëndimore. Por interesat turke
shkojnë edhe në Azinë qendrore. Kazakistani, Uzbekistani, Taxhikistani etj., janë
turqfolës, prandaj Turqia dëshiron të ketë supremacinë mbi këto shtete me naftë e
me shumë lëndë të para. Natyrisht, ky plan, për momentin vetëm ekonomik e kulturor,
shqetëson Rusinë, Iranin, Arabinë Saudite e Kinën. Turqia bëhet kështu për Evropën
një shtet me rëndësi të madhe gjeopolitike e prej saj do të varen fatet e Evropës,
të Lindjes së Mesme e të zonave të Azisë Qendrore.