Benedikti XVI, para largimit nga Spanja: “Përhapeni në të katër anët e botës këtë
përvojë gazmore e të thellë të fesë! Mirupafshim në Rio-de-Zhanéjro!”.
Rreth orës 18. 30, në Aeroportin “Barajas” të Madridit – veprimtaria e fundit e Ditës
së XXVI Botërore të Rinisë, që do të hyjë në historinë e rinisë botërore si “Dita
e Madridit”, për t’i hapur të rinjve rrugë edhe më të largëta, drejt Brazilit. Gjatë ceremonisë
së lamtumirës, Papa falënderoi autoritetet shtetërore, kombëtare e rajonale, si edhe
të gjithë ata që, në mënyra të ndryshme, siguruan suksesin e plotë të kësaj Dite të
Madhe, për pritjen që i bënë atij e të rinjve, të cilët mundën të vizitojnë shumë
qytete spanjolle e t’i ndjekin të gjitha veprimtaritë me gëzim e entuziazëm. Falënderoi
edhe Kishën në Spanjë për shërbimet e çmuara, që i bëri Kryebariut e të rinjve, duke
nisur nga katekizmi, për të përfunduar tek ky takim lamtumire. Organizatorëve kishtarë
të DBR-së, Papa iu drejtua me fjalët: “Ju ftoj tani ta përhapni në të katër
anët e botës përvojën gazmore e të thellë të fesë, që u jetua në këtë vend fisnik”. Por,
falënderimi kryesor i Atit të Shenjtë, iu drejtua Zotit: “Pasardhësi i Shën
Pjetrit i shpreh mirënjohjen e tij të thellë Hyjit, Zotit tonë: Po, festa e fesë,
e jetuar së bashku, na krijon mundësinë të shikojmë përpara me besim të plotë në Provaninë,
që i prin Kishës nëpër detin e historisë”. Prandaj mbetet i ri e plot gjallëri,
edhe pse i duhet të përballojë situata të vështira. Kjo është vepër e Shpirtit Shenjt,
që e bën Krishtin të pranishëm në zemrat e të rinjve të çdo epoke, duke zbuluar,
kështu, madhështinë e thirrjes hyjnore të çdo njeriu. Provuam – theksoi Ati i Shenjtë
- edhe se hiri i Tënzot i shemb muret e i zhduk kufijtë, që ngre mëkati, për t’i ndarë
popujt e breznitë, sepse dëshiron t’i bashkojë të gjithë popujt në një familje, në
familjen e një Ati të vetëm, e cila kultivon me punë e respekt, dhuratën e tij të
madhe, Gjithësinë: “Nuk duhet ta humbasim guximin përballë pengesave që,
në mënyra nga më të ndryshmet, duhet t’i kapërcejnë shumë nga vendet e botës. Dëshira
për Zotin, që Krijuesi ngjall në zemrat e të rinjve, e fuqia nga lart, dhuratë e
hirit hyjnor për ata, që ndjekin Mësuesin e ata, që gjejnë në Të ushqimin për jetën,
janë më të forta se të gjitha pengesat!”. Në përfundim, Papa iu drejtua
përsëri Mbretit të të gjithë spanjollëve me fjalët: “Madhëri. para se të kthehem
në Romë, dëshiroj t’i siguroj spanjollët se janë shumë të pranishëm në lutjen time,
se lutem në mënyrë të veçantë për bashkëshortët e për familjet, që përballojnë vështirësi
të të gjitha natyrave, për nevojtarët e të sëmurët, për pleqtë e fëmijët, e edhe për
ata, që nuk gjejnë punë. Lutem për të rinjtë e Spanjës. Jam i bindur se, të gjallëruar
nga besimi në Krishtin, do të japin ç’kanë më të mirë, duke e ndihmuar këtë vend t’i
përballojë sfidat e së sotmes e të ecë përpara në rrugën e harmonisë, të solidaritetit,
të drejtësisë e të lirisë.
Përfundoi, kështu, Shtegtimi i 20 ndërkombëtar
i Benediktit XVI , i 133-ti shtegtim i papëve jashtë Italisë në epokën bashkëkohore. Të
rinjtë tani do të nisin rrugën e kthimit në vendet e tyre, ngarkuar me kujtimet e
paharrueshme të Ditës së Madridit, që sapo përfundoi, e me dëshirën për të marrë pjesë
në Ditën e ardhshme botërore. Në rrugën e kthimit jehon përshëndetja: “Lamtumirë Madrid”
e “Mirupafshim Rio-de-Zhanéjro!”.