Papa viziton Fondacionin “Instituti i Shën Jozefit”, në Madrid.
Pas takimit me komitetet organizatore të DBR-së, Papa u nis për të vizituar Fondacionin
“Instituti i Shën Jozefit” që mbarështohet nga Urdhëri spitalor i Shën Gjonit të Zotit,
i cili njihet më shumë si Fatebenefratelli - Bënimirëvëllezër”. Ishte ftesa, që u
drejtonte Shën Gjoni i Zotit të gjithë njerëzve, për t’i ndihmuar të varfërit, të
sëmurët, të vemtuarit, të cilët vijojnë të enden pa strehë nëpër vise e në kohë. Qendra
e Kompleksit të Fondacionit është një Pallat, ndërtuar në vitin 1899, nën kujdesin
e markezit të Valejos e të Shën Benedikt Menit, rregulltar i Urdhërit. Këtu mjekohen
njerëz me kufizime fizike e mendore, në mënyrë të posaçme, ata që vuajnë nga epilepsia,
në gjuhën popullore, sëmundja e tokës. Kompleksi, i shpallur me interes historik,
ka dhjetë pavijone, me 400 krevate e 300 punonjës të shëndetësisë. Takimi i Papës
me të sëmurët, rregulltarët e personelin mjekësor u mbajt në fushën e sportit, në
hyrje të së cilës, për ta pritur Atin e Shenjtë, kishin dalë drejtuesit e Institutit.
Të pranishëm, edhe 200 fëmijë me kufizime fizike. Në një fjalim të shkurtër, Benedikti
XVI përballoi përsëri temën e dhimbjes, që bëhet edhe më e thellë, kur e mundon njeriun
në moshë të re. A mund të jetë përsëri e madhe jeta, kur ndërpritet brutalisht nga
dhimbja - pyeti Papa. Duke iu përgjigjur kësaj pyetjeje, jashtëzakonisht kritike,
theksoi: “Lidhur me këtë, në Enciklikën kushtuar shpresës së krishterë, nënvizova:
‘Vlera e njerëzimit përcaktohet kryesisht nga qëndrimi që mban ndaj vuajtjes e të
vuajturit. Një shoqëri, që nuk di t’i pranojë njerëzit e vuajtur e nuk është e aftë
të kontribuojë, me mëshirë, për t’i lehtësuar bashkërisht vuajtjet fizike e shpirtërore
të njeriut, është shoqëri mizore e çnjerëzore”. Papa foli përsëri për takimin
personal me Krishtin, kujtoi se jeta vlen të jetohet vërtet, vetëm kur vihet në shërbim
të Zoti e të njeriut, që vuan, e se, edhe jeta e të rinjve të sëmurë, është pasuri
e vërtetë për gjithë njerëzimin. Jeta e këtyre të rinjve, e shndërron zemrën e ngurtë
të njerëzve e prandaj, s’na mbetet tjetër, veçse t’i shprehim mirënjohjen tonë Zotit,
që na dha mundësinë t’i njohim - tha Papa dhe, në përfundim, vlerësoi lart shërbimin
e punonjësve të Institutit: “Shoqëria jonë, në të cilën shpesh vihet
në dyshim vlera e paçmuar e jetës, e çdo jete, ka nevojë për ju: ju kontribuoni për
të ndërtuar qytetërimin e dashurisë”. Papa e mbylli këtë takim prekës me
lutjen përfundimtare e bekimin apostolik, pasi u takua personalisht me dhjetë fëmijë
të sëmurë, për të lënë, si kujtim të kësaj vizite të paharrueshme, nënshkrimin e tij
në Librin e Artë të Fondacionit. Tani Benedikti XVI është në aeroportin e “Kuatro
Vientos”, me të rinjtë që marrin pjesë në Mbrëmësoren e lutjes e që nesër do të mblidhen
përsëri rreth Atit të Shenjtë, si apostuj e dëshmitarë të rinj, të ungjillëzimit të
ri të vendeve nga kanë ardhur, e ku do të rikthehen së shpejti, për ta vënë në jetë
mandatin, që po marrin në këtë natë të jashtëzakonshme!