Një risi në programin e kësaj Dite Botërore të Rinisë, është rrëfimi i disa të rinjve
nga vetë Papa. Nuk është hera e parë që të rinjtë rrëfehen me Papën, në ditët e
tyre botërore. Nisën ta marrin sakramentin e pajtimit me Zotin duke u gjunjëzuar për
herë të parë në rrëfyestoren e Papës Vojtila. Ndërsa Papa Racinger solli në ditët
botërore të rinisë dy gjëra të reja. E para, në Këln, në verën e vitit 2005. Në kulmin
e natës pa gjumë, Papa Benedikti XVI u gjunjëzua para Hostes së shuguruar. Gjatë.
Rrethuar nga një heshtje e thellë. E nga qindra mijëra të rinj, që u prekën në shpirt
nga një gjest i tillë adhurues. Që atëherë, me Papën Benedikti XVI, adhurimi eukaristik
i heshtur u bë i pranishëm jo vetëm në Ditët Botërore të Rinisë, por edhe në takime
të tjera masive, si për shembull, në mbrëmësoren e lutjes, në Hajd Park të Londrës,
më 18 shtator 2010. E reja e dytë nis me këtë ditë rinore të Madridit. Papa do
të rrëfejë në publik, një orë para se të kremtojë Meshën Shenjte. Për saktësi,
sakramenti i rrëfimit bën pjesë në programin e Ditëve Botërore të Rinisë duke nisur
nga takimi Rinor i Romës, në vitin 2000, kur Cirku Massimo u bë për disa orë, rrëfyestorja
më e madhe që kishte parë ndonjëherë bota. Gjon Pali II zbriste në bazilikën e
Shën Pjetritr një herë në vit, të Mërkurën e Madhe, për të rrëfyer disa orë. Edhe
Benedikti XVI e ka vijuar dy herë këtë traditë, gjithnjë në Bazilikën e Shën Pjetrit,
të enjten para së Dielës së Larit, më 29 mars 2007 dhe më 13 mars 2008.