Սուրիոյ Նախագահէն Կը Պահանջուի Իշխանութենէն Հեռանալ։
Միացեալ Նահանգներու նախագահ՝ Պարաք Օպամա Սուրիոյ նախագահ Պաշշար Ասատէն պահանջեց «իշխանութենէն
հեռանալ» եւ Դամասկոսի վրայ հաստատեց նոր եւ խիստ պատժամիջոցներ, որոնց շարքին` Միացեալ
Նահանգներու մէջ սուրիական դրամատնային պահեստներու սառեցումը եւ Սուրիոյ մէջ ամերիկեան
ներդրումներու արգիլումը: Յաւելեալ սուրիական ընկերութիւններ ներառուեցան ամերիկեան սեւ
ցանկին վրայ: Անոնց շարքին է քարիւղի պետական ընկերութիւնը: Միացեալ Նահանգներու արտաքին
գործոց նախարար Հիլըրի Քլինթըն իր կարգին յայտնեց, որ սուրիական կառավարութիւնը բողոքի
ցոյցերուն ի պատասխան վստահեցուցած էր որ Սուրիա դէպի ժողովրդավարութիւն փոխանցումին
սկսած է: Եւրոպական Միութիւնը, ու նաեւ Ֆրանսա, Գերմանիա եւ Բրիտանիա իրենց կարգին միացեալ
յայտարարութեամբ մը Ասատէն պահանջեցին հեռանալ իշխանութենէն։ Զուիցերիա պւ նաեւ արաբական
հինգ պետութիւններ` Քաթար, Սէուտական Արաբիա, Պահրէյն, Քուէյթ եւ Թիւնիզի Դամասկոսի մէջ
իրենց դեսպանները տուն կանչած են: ՄԱԿ-ի Մարդկային իրաւանց բարձրագոյն յանձնախումբը
ՄԱԿ-ի Ապահովութեան խորհուրդէն պահանջեց հարցը փոխանցել Քրէական միջազգային դատարանին: Կը
նախատեսուի, որ ՄԱԿ-ի Մարդկային իրաւանց յանձնախումբը երկուշաբթի օր Սուրիոյ շուրջ յատուկ
նիստ մը գումարէ: Մինչ այդ, Սուրիոյ նախագահը ՄԱԿ-ի ընդհանուր քարտուղար Պան Քի Մունի
հետ ունեցած հեռաձայնային հաղորդակցութեան մը ընթացքին նշած է, որ սուրիացի զինուորականներն
ու ոստիկանները աւարտած են բոլոր զինուորական գործողութիւնները: Միւս կողմէ, Թուրքիոյ
վարչապետ Ռեճեփ Թայիփ Էրտողան նմանցնելով Սուրիոյ մէջ կացութիւնը Լիպիոյ կացութեան,
ըսաւ որ եթէ զինուորական գործողութիւնները չդադրին Թուրքիա դրացի այդ երկրին մէջ իր
խօսքը պիտի ունենայ: Նշենք, որ Սուրիոյ նախագահը չորեքշաբթի օր Պաաս կուսակցութեան
Կեդրոնական կոմիտէի ժողովին ընթացքին յայտարարեց, որ Սուրիա «ուժեղ եւ դիմադրող պիտի
մնայ, եւ չէ հրաժարած եւ պիտի չհրաժարի իր արժանապատուութենէն եւ գերիշխանութենէն»: