Të krishterë e myslimanë: të promovojmë përmasën shpirtërore të njeriut.
Këshilli Papnor për dialogun ndërfetar dërgon, çdo vit, një shenjë miqësie e dialogu
me botën myslimane, për Id al-fitr – mbylljen e muajit të Ramazanit, një muaji të
veçantë urate, dashuria, bamirësie e solidariteti me të varfrit – u dërgon një mesazh
përgëzimi e urimi myslimanëve. Mesazhi, si zakonisht ka si përmbajtje, urimet, përgëzimet
dhe një reflektim mbi një temë të veçantë me interes të përbashkët. Mesazhi i Këshillit
Papnor për Dialogun Ndërfetar për përfundimin e Ramazanit ‘Id al-Fitr 1942 H./2011
A.D. Të krishterë e myslimanë: të promovojmë përmasën shpirtërore të njeriut.
Qytet
i Vatikanit
Të dashur Miq myslimanë, 1. Përfundimi i muajit të Ramazanit
i krijon Këshillit Papnor për Dialogun Ndërfetar rastin e dëshiruar t’ju drejtojë
urimet më të përzemërta që flijimet e bëra bujarisht gjatë këtij muaji, të japin frytet
e shpresuara shpirtërore.
2. Këtë vit, na u duk e arsyeshme të theksojmë
temën e përmasës shpirtërore të njeriut. Është një realitet me rëndësi të dorës së
parë, si për të krishterët, ashtu edhe për myslimanët, posaçërisht përballë sfidave
të materializmit e të shekullarizimit. Lidhja e çdo njeriu me trashendencën nuk është
fryt i rrethanave të historisë. Është e shkruar në vetë natyrën njerëzore. Ne nuk
besojmë rastësisht, por jemi të bindur se Zoti na prin në udhën tonë. E këtë e provojmë
çdo ditë.
3. Si të krishterët e myslimanët, pavarësisht nga ndryshimet,
e njohin dhe mbrojnë dinjitetin e njeriut, me të drejtat e detyrat e tij. Të dyja
palët mendojnë se arsyeja e liria janë dhurata po aq të çmuara që duhet t’i inkurajojnë
besimtarëve, t’i pranojnë këto vlera, që i kemi të përbashkëta, sepse mbështetën mbi
të njëjtën natyrë njerëzore.
4. Ja, pra, pse të dyja palët kemi të njëjtin
shqetësim: t’ua transmetojmë këto vlera njerëzore e morale breznive të reja. Na takon
ne t’i ndihmojnë të zbulojnë ç’është e mirë e ç’është e keqe, t’u tregojmë se ndërgjegjja
është shenjtërore, që duhet respektuar; se përmasa shpirtërore i bën njerëzit më të
përgjegjshëm, më solidarë e më të gatshëm për t’i shërbyer së mirës së përbashkët.
5.
Tepër shpesh të krishterët e myslimanët janë dëshmitarë të shkeljes e dhunimit të
gjërave të shenjta dhe të mosbesimit ndaj atyre, që deklarojnë haptazi se janë besimtarë.
Nuk mund të mos i dënojmë të gjitha format e fanatizmit e të frikësimit, të paragjykimeve
e të polemikave, e sidomos, të diskriminimeve të besimtarëve në jetën shoqërore e
politike, ashtu si edhe në fushën e mjeteve të komunikimit.
6. Jemi shpirtërisht
pranë Jush, të dashur Miq. I lutemi e i kërkojmë Zotit t’ju japë forca të reja shpirtërore
e ju urojmë përzemërsisht paqe e lumturi!