Papa gazetarëve në udhëtim drejt Madridit: DBR-së, një rreze drite që ndriçon praninë
e Zotit në botë. Ekonomia nuk duhet të ketë si synim vetëm përfitimin
Gjatë fluturimit për në Madrid, Benedikti XVI, sipas traditës, është përgjigjur në
disa pyetje që i drejtuan gazetarët. Papa nënvizoi rëndësinë e DBR-së jo vetëm për
të rinjtë, por edhe për mbarë Kishën. Këndej, duke përgjigjur mbi krizën aktuale ekonomike,
ripohoi se njeriu e jo përftimi duhet të jetë në qendër të ekonomisë. DBR-së “e
lidhë botën e Zotin”, dhe është “një realitet i rëndësishëm për të ardhmen e njerëzimit”:
kështu pohoi mes tjerash Papa Benedikti XVI gjatë bashkëbisedës së tij me gazetarët
që e shoqëronin në avion gjatë fluturimit drejt Madridit, e vuri theksin mbi vlerën
e jashtëzakonshme të Ditëve Botërore të Rinisë, që janë dhuratë dhe frymëzim i të
Lumit Gjon Palit II: “Do të thosha se këto DBR-së janë një sinjal, një kaskadë
drite; japin një pamje feje, e bëjnë të dukshme praninë e Hyjit në botë e kështu e
përforcojnë guximin dhe të qenit besimtarë. Shpesh besimtarët ndjehen të izoluar në
këtë botë, gati gati të humbur. Këtu ata shohin që nuk janë të vetëm, se ekziston
një rrjetë e madhe feje, se ekziston një bashkësi e madhe besimtarësh në botë, se
është gjë e bukur ta jetosh këtë miqësi universale”. DBR-së, tha në vijim Papa,
nuk janë një “ngjarje e izoluar”, janë pjesë e një udhe më të madhe që kërkon më shumë
se një parapërgatitje teknike. Prandaj, kam ofruar një reflektim mbi udhëtimin që
fillon pas këtyre ngjarjeve të mëdha kishtare: “Më duket se DBR-së duhet të
konsiderohet në këtë këndvështrim e kuptim, si shenjë, një pjesë e udhëtimit të madh,
krijon miqësi, hap kufijtë dhe e bënë të dukshëm faktin që është gjë e bukur të jesh
me Zotin, se Zoti është me ne. Në këtë kuptim, duam të vazhdojmë me këtë ide të madhe
të të Lumit Gjon Palit II”. Pyetja tjetër që iu drejtua Papës Benediktit XVI
u përqendrua mbi krizën aktuale botërore ekonomike, efektet negative të së cilës ndjehen
sidomos tek të rinjtë: “Në krizën aktuale ekonomike konfirmohet ajo që është
shfaqur edhe në krizat e mëdha të mëparshme, se përmasa etike nuk është diçka e jashtme
dhe e shkëputur nga problemet ekonomike, por një përmasë e brendshme dhe themelore
e saj. Ekonomia nuk funksionon vetëm me vetë-rregullimin tregtar, por ka nevojë edhe
për përmasën etike për të funksionuar e për ti shërbyer njeriut”. Benedikti
XVI përkujtoi këtu mësimet shoqërore të Papës Gjon Palit II e në mënyrë të veçantë
pohimin se “ekonomia nuk duhet të matet sipas përfitimit maksimal, por sipas së mirës
dhe mirëqenies të të gjithëve”. Kështu Ati Shenjtë Ratcinger nënvizoi domosdoshmërinë
e mos anashkalimit të vlerës së përgjegjësisë. Evropa, vërejti Papa, duhet të mendon
edhe për problemet ekonomike të atyre, që në vise të tjera të botës, vuajnë nga uria
e nuk kanë të ardhme. Akoma, Papa nguli këmbë tek përmasa e përgjegjësisë ndaj brezave
të ri:
“Nëse të rinjtë e sotëm nuk gjejnë perspektiva në jetën e tyre, atëherë
edhe e sotmja e jonë është e gabuar dhe ‘e keqe’. Prandaj, Kisha me doktrinën e saj
shoqërore, me doktrinën e saj mbi përgjegjësinë e Zotit, nxit të hiqet dorë maksimalisht
nga përfitimi e gjërat të shikohen në përmasën humaniste e fetare, do të thotë të
ndihmohet njëri-tjetri”. “Të gjithë përherë duhet të kërkojmë të vërtetën,
vlerat e vërteta”, vijoi Papa duke treguar në të drejtat themelore të njeriut “thelbin
e vlerave” të përbashkëta.