Երիտասարդական Օրեր Հայկական Եռագոյնով Լիբանանի Մէջ։
՜՜Արմատացած Քրիստոսի մէջ եւ հաստատ հաւատքով՝՝ Մատրիտ - Պէյրութ 2011 JMJ
Madrid 2011-ի Պատրիարքական թեմի յատուկ յանձնախումբին եւ երիտասարդական յանձնախումբին
կազմակերպութեամբ տեղի պիտի ունենայ թեմական մակարդակի վրայ երկու օրերու երիտասարդական
ուխտագնացութիւն դէպի Ուատի Աննուպինի սրբավայրերը(Լիբանան), 20-21 օգոստոս 2011-ին:
Մեկնումը պիտի ըլլայ Պէյրութէն: Երիտասարդները, որոնք կը կազմակերպեն այս ձեռնարկը, ըսած
է Պէյրութի Ս Փրկիչ եկեղեցւոյ փոխ ժողովրդապետը Հայր Սեպուհ վրդ. Կարապետեան, հակառակ
բոլոր դժուարութիւններուն, ծրագրած են երկար քայլարշաւներ, որոնք պիտի յատկանշեն Էմմաուսի
աշակերտներուն ընթացքը, եւ հանդիպումը Յիսուսի դէմքին: Երիտասարդները որոնք չկրցան Մատրիտ
երթալ զանազան պատճառներու համար (հիմնականը՝ նիւթական), պիտի փորձեն ապրիլ նոյն հաստատ
հաւատքը, իրենց կեանքը արմատացած պահելով Քրիստոսի մէջ: Անոնք պիտի միանան ուղիղ համացանցային
գիծով համաշխարհային երիտասարդական օրուան հանդիսութիւններուն Մատրիտի մէջ, եւ նոյն ժամերուն
իրենք ալ աղօթքի պահեր պիտի ունենան: Եկեղեցւոյ եւ ընկերութեան ապագան հանդիսացող երիտասարդ
երիտասարդուհիներուն կը մաղթենք յաջողութիւն որպէսզի աղօթքով ու կեանքի օրինակով միշտ
կապուած մնան Քրիստոսի ու անոր աւետարանին։