Каля паўмільёна маладых
людзей з 192 краін прыбылі на Сусветныя дні моладзі ў Мадрыд, каб разам маліцца, спяваць,
дзяліцца сваёй верай і сустрэць Папу. Дзякуючы візіту Бэнэдыкта XVI моладзевая сустрэча
набыла асаблівую вагу і папулярнасць не толькі ў каталіцкім асяроддзі. На заключнай
св. Імшы 21 жніўня чакаецца больш за адзін мільён удзельнікаў.
Сусветны форум
будзе афіцыйна адкрыты сёння вечарам св. Імшой на мадрыдскай плошчы Сібэлес. 17, 18
і 19 жніўня каля 250 біскупаў з усяго свету, сярод іх арцыбіскуп Тадэвуш Кандрусевіч,
кожную раніцу будуць праводзіць катэхезы для маладых пілігрымаў. Моладзь для правядзення
такіх сустрэч была размеркавана па парафіях з улікам моўнага фактару.
У дадатак
да катэхез, на форуме, маладыя людзі стануць удзельнікамі разнастайных культурных
праграм і больш чым 300 мерапрыемстваў, ад канцэртаў да невялікага кінафестывалю,
а таксама бясплатнага ўваходу ў мадрыдскі Прада.
Заснавальнікам Сусветных дзён
моладзі быў папа Ян Павел II. З 1985 г. Святы Айцец запрашаў моладзь на падобныя сустрэчы.
Мэта такіх мерапрыемстваў, паводле ідэі Пантыфіка, даць магчымасць “адкрыць маладую
і актуальную таямніцу Касцёла ў супольным перажыванні пілігрымавання, малітвы, медытацыі
і адарацыі”. Асабліва буйныя мерапрыемствы былі праведзены ў 1991 г. у Чэнстахове,
1993 г. у Дэнверы, 1995 г. у Маніле, у 1997 г. у Парыжы, 2000 г. падчас Юбілейнага
года ў Рыме і 2005 г. у Кёльне. Апошняя такая сустрэча адбылася ў аўстралійскім Сіднэі
ў 2008 г.