Беларусь: Браслаў рыхтуецца прыняць тысячы пілігрымаў
Прыазёрны Браслаў
рыхтуецца адзначыць урачыстасць сваёй самай шанаванай святыні – абраза Маці Божай
Браслаўскай, які каранавалі папскімі каронамі ў 2009 г. Мерапрыемствы пачнуцца ў наступную
пятніцу, а пакуль у горадзе чакаюць маладых людзей з усёй Беларусі. Ужо стала
традыцыяй – напярэдані свята праходзіць сустрэча моладзі. Сёлета – шосты раз. Пачатак
– 17 жніўня. Звычайна каля 300 чалавек прымаюць удзел у форуме. Праграма яго разнастайная:
канферэнцыі, катэхезы, а таксама заняткі па інтарэсам – малітоўныя, танцавальныя,
песенныя, нават спартыўныя (адбудзецца футбольны матч). Увогуле арганізатары прапануюць
шмат карыснага – і для роздуму, і для адпачынку. Новыя веды ўдзельнікі прадэманструюць
падчас гала-канцэрта, які стане завяшальным акордам сустрэчы моладзі і пачатковым
для урачыстасці Маці Божай Браслаўскай. Знамянальна, што ў гэтым годзе моладзь будзе
духоўна лучыцца са сваімі аднагодкамі ў Мадрыдзе, дзе адначасова з браслаўскай сустрэчай
будуць праходзіць Сусветныя дні моладзі.
Амаль эстафета – свята Маці Божай
Валадаркі азёраў пачнецца 19 жніўня. У 18.00 гадзін св. Імшу будзе цэлебраваць Біскуп
Віцебскі Уладзілаў Блін. Браслаў у гэту ноч спаць не будзе – падзеі адна за другой.
Апоўначы з касцёла на Замкавую гару пройдзе працэсія са свечкамі. Яе ўзначаліць іерарх
з Польшчы біскуп Мар’ян Крушыловіч. Потым – малітоўнае чуванне і раняшняя літургія.
Св. Імшу ў 11.00 гадзін узначаліць дапаможны біскуп Мінска-Магілёўскай архідыяцэзіі
Антоній Дзям’янка. Асноўныя мерапрыемствы пройдуць на вялікім вулічным алтары ў выглядзе
карабля, які быў зроблены спецыяльна да ўрачыстасцяў каранацыі абраза.
У гэтыя
дні ў горад прыедзе шмат гасцей з усёй Беларусі, Латвіі, Літвы, Расіі. А таксама цэлы
калектыў духавога аркестра з Польшчы, які дасць некалькі канцэртаў. Радаснай нотай
браслаўскага свята стане думка аб Сусветных днях моладзі ў Мадрыдзе, куды кіруюцца
ўжо зараз і беларускія пілігрымы, а сумнай – успамін аб кардынале Казіміры Свёнтку,
з дня адыходу ў вечнасць якога міне 30 дзён.