Святы Пасад адзначыць 50-годдзе II Ватыканскага сабора
У наступным годзе
спаўняецца 50 гадоў з дня адкрыцця II Ватыканскага сабора, які лічыцца адным з самых
значных падзей у сучаснай гісторыі Каталіцкага Касцёла. Папскі камітэт гістарычных
навук і Папскі Латэранскі універсітэт рыхтуюць шэраг канферэнцый, прысвечаных сабору.
Дыскусіі
аб дзейнасці II Ватыканскага сабора і яго наступствах працягваюцца і сёння. У сувязі
з гэтым Святы Пасад вырашыў выкарыстаць надыходзячы юбілей, каб абмеркаваць думкі,
рашэнні і наступствы сабора, якія выклікаюць спрэчкі.
З 3 па 6 кастрычніка
2012 г. у Рыме пройдзе міжнародны кангрэс, які арганізуе Папскі камітэт гістарычных
навук сумесна з Цэнтрам па вывучэнні II Ватыканскага сабора. Арганізатары маюць намер
зрабіць кангрэс месцам, дзе сканцэнтруюцца міжнародныя даследаванні, прысвечаныя гісторыі
Каталіцкага Касцёла і II Ватыканскага сабора.
Арганізатары кангрэса імкнуцца
да таго, каб дакументы з асабістых архіваў удзельнікаў сабора сталі сусветным здабыткам.
Тым самым пашырыцца кантэкст і разуменне рашэнняў сабора, што, на іх думку, дапаможа
пераадолець недахопы і аднабаковую інтэрпрэтацыю ў разуменні спадчыны сабора. Міжнародная
сустрэча павінна, згодна з намерам арганізатараў, дазволіць падсумаваць вынікі працы
ўдзельнікаў сабора. Каталог сабраных дакументаў стане асновай для наступнага кангрэса,
прысвечанага 50-й гадавіне закрыцця II Ватыканскага сабора, які пройдзе ў 2015 г.
Іншая
ініцыятыва правядзення навуковых канферэнцый, прысвечаных ІІ Ватыканскаму сабору,
належыць Цэнтру даследаванняў “II Ватыканскі сабор” Папскага Латэранскага ўніверсітэта.
Сумесна з Цэнтрам св. Людовіка Французскага ў перыяд з лютага па май 2012 г. будуць
праведзены міжнародныя сустрэчы на тэму “Рэдактура галоўных дакументаў II Ватыканскага
сабора. Гісторыя і тэалогія”.