Кардынал Антоніо Марыя
Руоко Варэла, арцыбіскуп Мадрыда, выказаў падзяку валанцёрам Сусветных дзён моладзі
за іх напружаную працу і папрасіў маліцца за ўдалы візіт Бэнэдыкта XVI у сталіцу Іспаніі.
Кардынал адправіў 9 жніўня св. Імшу ў цэнтральным бюро сусветнага форуму ў Мадрыдзе,
на якой прывітаў тысячы міжнародных валанцёраў, якія ўжо прыбылі ў іспанскую сталіцу.
Ён сказаў, звяртаючыся да 2 тыс. чалавек, што для іх гэта будзе складаны і “гарачы”
час, калі яны, магчыма, не змогуць “у поўнай меры атрымаць асалоду ад падзей”. Іерарх
падзякаваў маладым валанцёрам за іх гатоўнасць служыць іншым ахвяруючы сваімі жаданнямі
і камфортам. Падчас св. Імшы маладыя людзі з розных краін чыталі ўрыўкі Евангелля
і пелі фрагменты гімну Сусветных дзён моладзі на родных мовах.
На працягу
наступных некалькі дзён, валанцёры будуць падзелены на невялікія групы і размешчаны
ў канкрэтных месцах правядзення мерапрыемства па ўсім горадзе. Каля 3 тыс. з іх прайшлі
курсы аказання першай медыцынскай дапамогі, эвакуацыі і тэхнікі бяспекі. Маладыя людзі,
асістэнты асоб з абмежаванымі магчымасцямі, таксама прайшлі спецыяльную падрыхтоўку.
Больш за 28,5 тыс. валанцёраў будзе дапамагаць на Сусветных днях моладзі з такіх
краін як: Польшча, Італія, Мексіка, Францыя, Дэмакратычная Рэспубліка Конга, Славакія,
Харватыя, Бразілія, Партугалія, ЗША, Венгрыя, Аргентына і Літва.