Johan Jørgensen lindi në Svendborg, më 6 nëntor 1866 e vdiq po aty, më 29 maj 1956.
Është shkrimtar e poet i njohur danez. Ende i vogël, u detyrua të largohet nga vendlindja,
për të vijuar shkollën e mesme në Kopenhagen ku, si mori diplomën e pjekurisë, hyri
në rrethe artistike të ndikuara fuqimisht nga idetë socialiste, ide që nisën të ndjeheshin
fort në krijimet e para poetike. Talenti i tij letrar ra shpejt në sy në faqet
e revistës Taarnet (Kulla), ku nisi të botonte poezi, shkruar me gjuhë mataforike
e frymëzim simbolist. U bë, kështu, bashkëpunëtor e, më pas, edhe redaktor i revistës,
ndonëse vargjet e tij u sulmuan shpesh nga rrethe të ndryshme letrare të kohës. Johani
ishte protestant. Por kur u takua me argjendarin Mogens Ballin, hebre i kthyer në
katolicizëm, vendosi të pagëzohej e, bashkë me mikun e ri, u nis për të vizituar
Asizin. Këtu, në vitin 1894, duke admiruar me gjithë zemër jetën e veprën e Shën Françeskut,
nisi të shkruajë faqe krejt të reja, të ndikuara fuqimisht nga fryma françeskane.
Ndërmjet tyre edhe “Shtegtime françeskane” prej nga e shkëputëm fragmentin kushtuar
Shën Kiarës. Shkrimet patën sukses të jashtëzakonshëm e jo vetëm në botën katolike.
I siguruan titullin “Qytetar nderi i Asizit” e i vendlindjes, Svendborgut. Vijoi
të shkruante jetëshkrimet e shenjtorëve më të njohur të Kishës katolike, ndërmjet
të cilëve, jetën e Shën Brixhidës, të Shën Katerinës nga Siena, të Shën Gjon Boskos
e të Shën Françeskut të Asizit, të gjitha plot me përshkrime mahnitëse, frymëzuar
nga bukuritë e natyrës, në gjirin e së cilës kaloi një pjesë të mirë të jetës. U ndikua
edhe nga poezitë e Shën Françeskut, posaçërisht nga “Kënga e Krijesave”, “Kënga e
vëllait diell” e këngët kushtuar Italisë nga Françesk Bernardoni, që konsiderohet
më shenjti ndër italianë e më italiani ndër shenjtën. Pas endjeve nga Danimarka,
në Itali e në Suedi, u rikthye në vendlindje, ku vdiq në moshën 90 vjeçare. Pushon
në paqe në varrezën e Svendborgut. Shkrimtari danez, që ka tërhequr vëmendjen e
mbarë botës, sidomos asaj françeskane e që është përkthyer në shumë gjuhë, pret të
mësojë edhe gjuhën shqipe. Shkrimi kushtuar Shën Kiarës është belbëzimi i tij i parë
shqip.