Լոնտոնի Թոթենհամ թաղամասին մէջ ոստիկաններու կողմէ երիտասարդի մը սպանութեան դէմ իբրեւ
բողոք ցուցարարներուն եւ ոստիկանութեան միջեւ տեղի ունեցան բախումներ, որոնց պատճառով
26 ոստիկաններ վիրաւորուեցան եւ 42 ցուցարարներ ձերբակալուեցան: Բախումներուն մասնակցեցան
շուրջ 300 ցուցարարներ, որոնք հրկիզեցին ոստիկանական երկու ինքնաշարժներ եւ փոխադրակառք
մը, ոստիկաններուն վրայ քարեր ու շիշեր նետեցին եւ թալանեցին քանի մը խանութներ: Խռովութիւնները
վերջ գտան, երբ դէպքին վայրը շրջափակուեցաւ ոստիկանական յաւելեալ ստորաբաժանումներու
կողմէ: Խռովութիւնները սկսան, երբ թաղամասի բնակիչները հաւաքուեցան տեղւոյն ոստիկանատան
մօտ` բողոքելու համար 5 օգոստոսին 29-ամեայ Մարք Տականի սպանութեան դէմ: Ոստիկանական
հաղորդագրութեան մէջ կը նշուի, որ երիտասարդը միջադէպի մը ընթացքին կրակեց ոստիկանի մը
ուղղութեամբ, որուն պատասխան կրակոցէն սպաննուեցաւ: