Թել Աւիւի մէջ ցուցարարներ փողոցներու մէջ վրաններ լարած են` իբրեւ բողոք Իսրայէլի մէջ
կեանքի պայմաններու, յատկապէս բնակարաններու սակի սղութեան: Հակառակ Իսրայէլի արձանագրած
տնտեսական մեծ աճին, ժողովուրդը կեանքի դժուար պայմաններ կը դիմագրաւէ, ինչ որ Սպանիոյ
եւ այլ երկիրներու մէջ տեղի ունեցածին նման բողոքի ցոյցեր կը յառաջացնէ: Շաբաթներէ
ի վեր տեղի ունեցող ցոյցերու մասնակիցներուն թիւը սրընթաց աճ արձանագրեց, ինչ որ երէկ
իսրայէլեան կառավարութիւնը մղեց ցուցարարներուն մտահոգութիւնները քննելու յանձնախումբ
մը յառաջացնելու: Իսրայէլի վարչապետ Պենիամին Նեթանիահու յայտնեց, որ «այս յանձնախումբը
հասարակութեան տարբեր մասերուն հետ համապարփակ երկխօսութիւն պիտի կատարէ, անոնց դժուարութեանց
ու առաջարկներուն ականջ պիտի տայ եւ ելեւմուտքի նախարարին գլխաւորութեամբ ընկերային-տնտեսական
սեղմ կառավարութեան յանձնարարականներ պիտի ներկայացնէ»: Շաբաթ օր տեղի ունեցած ցոյցին
ծաւալը կառավարութեան համար անկարելի դարձուց հասարակութեան զգացումները անտեսել: Շուրջ
քառորդ միլիոն ցուցարարներ Թել Աւիւի եւ Երուսաղէմի մէջ իրենց բողոքի ձայնը բարձրացուցին: Ցոյցի
ղեկավարները հրապարակեցին պահանջներու ցանկ մը, ներառեալ` աժան բնակարաններու կառուցում
եւ ամէն գնումի վրայ 16 առ հարիւրի տուրքի ջնջում: